Gabaonitas apyaqmagkáseykekxa kélteméssessamakxa'
1 Teyepmeyk axta meyk segaqhe neyseksa apteme wesse' apwányam David ekweykmoho apqántánxo apyeyam. Tén axta David appaqhetchessama Wesse' egegkok, axta aptemék apchátegmoweykegko Wesse' egegkok: “Saúl aptémakxa ekmaso keñamak ektepa meyk segaqhe, tén han apkeltémakxa m'a apnámakkok, hakte apkelnapmeyk ma'a gabaonitas.”
2 Apkeláneyáha axta David ma'a gabaonitas keñe apkelpaqhetchesa. (Háwe axta énxet'ák Israel ma'a gabaonitas, amorreos apkeleymomap axta m'a, cham'a aphéssamo axta mók apkelpaqhetchásamákpoho m'a énxet'ák Israel, apkeltémo metnéssessamók chá'a exma ekmaso, cham'a apmáheyo axta emasséssók ma'a Saúl, eñama apkelmeyeykha m'a énxet'ák Israel tén han Judá.) 3 Apkelmaxneyáha axta David:
—¿Háxko sa' atnéssesek ko'o kéxegke? ¿Háxko atnehek ko'o ayaqmagkassásekxak ma'a ekmaso kélteméssessamakxa axta kéxegke, yaqwayam enxoho kaltaqmalmakha kélpeywa kólxénmakha m'a Wesse' egegkok énxet'ák apagkok?
4 Apkelátegmowágkek axta gabaonitas:
—Mogmenyeyk negko'o selyaqye ekyaqmageykekxa senteméssessamakxa axta m'a Saúl yetlo apketchek, mogmenyeyk han negko'o yetsapok xama énxet se'e Israel nak.
Aptáhak axta David apkeláneya s'e:
—Héltennés kéltamhókxa enxoho atnéssesek kéxegke.
5 Apkelátegmowágkek axta xa énxet'ák nak:
—Énxet apmáheyo nak hegmasséssók apkeláneykekxa nak aptáhakxa yaqwayam hẽlnápok, yaqwayam mólweynchamha makham se'e ekyókxoho nak kañe' Israel, 6 egmenyeyk negko'o hẽlmések siete aptawán'ák neptámen xa énxet nak, keñe sa' negko'o ólmakhésha néten nápaqtók Wesse' egegkok ma'a Guibeá, apkeñamakxa axta Saúl, apkelyéseykha axta Wesse' egegkok.
Apxénchek axta elmések ma'a wesse' apwányam, 7 apmeyókek axta eyke m'a Mefi-bóset, Jonatán axta apketche, Saúl axta aptáwen, eñama m'a aphéssamo axta mók apkelpaqhetchásamákpoho ekmámnaqsoho m'a Jonatán. 8 Keñe axta apkelma m'a apqánet étchek axta m'a Rispá, Aiá axta apketche kelwána, ekwetasso axta m'a Saúl, cham'a Armoní tén han ma'a pók axta apwesey Mefi-bóset, keñe axta han ma'a cinco étchek axta m'a Merab, Saúl axta apketche kelwána, ekwetasso axta m'a Adriel, Barzilai axta apketche, apkeñama axta Meholá, 9 keñe apkelmésa m'a énxet'ák Gabaón, apkelchexnágkek axta m'a néten nak egkexe, nápaqtók ma'a Wesse' egegkok. Cháxa ektáhakxa axta apkeletsapa apyókxoho xa siete nak, eyeynókxa axta émha amonye' ekhem apnakxamap ma'a apho hótáhap.
10 Keñe axta Rispá, Aiá axta apketche, élántaxneykxo apáwa sẽlwáxaqxamól'a magkenatchesso élapwokmo, keñe axta ekyetnakmo m'a néten nak meteymog. Hakmek axta m'a, eyeynamo m'a sekxók apnakxamap apho nak hótáhap, ekweykmoho ekwa'akto makham ekmámeye, axta kahayók xama enxoho kay'áwak náta ekhem ma'a kélhapák, axta han kahayók kay'áwak xama enxoho aqsok nawha'ák éllo m'a axta'a.
11 Xama axta kéltennáseyncha'a David ektémakxa m'a Rispá, kelán'a apmeykha naqsa axta m'a Saúl, 12 apxegkek axta apkelwákxo m'a Saúl apexchakkok tén han ma'a apketche axta Jonatán, apkelmoma axta m'a apheykha nak Jabés, ekpayho nak Galaad. Apkelmenyexma axta m'a apkelweynchámeykegkaxa nak chá'a énxet'ák, ekyetnama nak Bet-sán, apkelmakheyáseykegkaxa axta filisteos, apchaqhama axta Saúl ma'a Guilboa. 13 Keñe axta David apkeltamho kólsakxak Saúl apexchakkok tén han Jonatán, apkeltamhók axta han kólmekxak apexchakkok ma'a kélmakheyáseykha axta néten; 14 kélátawanyeyk axta han Saúl apexchakkok keñe han Jonatán ma'a takhaxpop apagkok axta m'a Quis, Saúl axta apyáp, ekpayho nak Selá, yókxexma nak Benjamín. Kelánéxcheyk axta ekyókxoho m'a apkeltamhókxa axta kalanaxchek ma'a wesse' apwányam. Keñe axta natámen xa apma takha' Dios kélmaxnagko m'a apchókxa nak.
Abisai apwagkasso teyp David
15 Apkempakhákxeyk axta makham filisteos ma'a énxet'ák nak Israel. Keñe axta apxega David yetlo sẽlpextétamo apkelwesse'e apagkok yaqwayam elnapakpok ma'a. Apyampa'awók apagko' axta han ma'a David, 16 keñe axta xama énxet apwenaqte apwesey axta Isbí-benob apmako yaqhek. Treinta kilos axta ekyentaxno sawhéwa apagkok, axnagko' axta han sókwenaqte apagkok apkexna m'a nepxet. 17 Keñe m'a Abisai, Seruiá axta étche, appásegwokmo m'a David, apketámegkek axta m'a filisteo keñe apchaqha. Keñe axta David apkelxegexma'a apkeltamho melyetlewek chá'a elmahagkok kempakhakma, yaqwayam enxoho megkaspónhek élsassóxma m'a Israel.
Énxet'ák apkelwenaqte kélempakhe
(1 Cr 20.4-8)18 Tepékxeyk axta makham mók kempakhakma yókxexma Gob apkempakhákpo m'a filisteos. Apchaqhak axta han Sibecai ma'a Saf, cham'a Sibecai apteme axta husatita, aptáwen neptámen axta m'a énxet'ák apkelwenaqte. 19 Keñe axta makham mók ekteyapma kempakhakma apkempakhamap ma'a filisteos, axta han payhok ma'a Gob nak, apchaqhak axta han Elhanán ma'a Goliat, apkeñama axta m'a Gat, cham'a Elhanán, Jaír axta apketche, apkeñama axta m'a Belén, awanhók agko' axta apakxak sawhéwa apagkok, hawók axta m'a yámet apkelánamákpexal'a apáwa.
20 Tepékxeyk axta makham mók kempakhakma m'a Gat. Aphegkek axta han xama énxet apwenaqte apagko' ma'a, veinticuatro axta apophék: seis axta apophék apmék, tén han seis ma'a apmagkok nak. Axta han aptawán'ák neptámen ma'a énxet'ák apkelwenaqte axta, 21 Apkelwanyeyha axta m'a énxet'ák Israel, apchaqhak axta eyke m'a Jonatán, Simá axta apketche, apyáxeg axta m'a David.
22 Cháxa cuatro énxet'ák apkelwenaqte nak, apteme axta han aptawán'ák neptámen ma'a Réfah, apkeñama axta Gat, apkelnapmeyk axta eyke m'a David, tén han ma'a sẽlpextétamo apagkok nak.
© © Enxet Lengua Sur Bible © Paraguayan Bible Society, 2015.