1 Aptaxnegkek axta apchókxa Nabucodonosor, wesse' apwányam axta Babilonia, neyseksa apteme wesse' apwányam Joaquim, apqántánxo apyeyam axta han apteme apkeláneykha m'a Joaquim. Tén axta apyaqmagkasa makham mók ektáhakxa apwáxok, apkenmexákxeyk axta. 2 Apkeláphássek axta eyke Wesse' egegkok apkeltamho ey'ammok ma'a apkelmenyexma nak caldeos, sirios, moabitas tén han amonitas. Apkeláphássek axta ektamagkok ma'a Judá yaqwayam emasséssók, ekhawo m'a ektémakxa axta apxeyenma Wesse' egegkok, apchásenneykekxo axta exének ma'a apkeláneykha apkellegasso nak appeywa. 3 Temegkek axta Judá xa ektáha nak, hakte Wesse' egegkok axta apkeltémo katnehek, yaqwayam enxoho elyetnakhaksek aphakxa eñama m'a ekyókxoho mey'assáxma apkelane axta Manasés, 4 eñama han ma'a apkelnapma axta énxet'ák meyke apkeltémakxa, apsawheyáseykekxoho axta éma apagkok ma'a Jerusalén. Axta keñamak memáheyo elásekhekxohok makham ma'a Wesse' egegkok.
5 Ektémakxa axta apweynchámeykha Joaquim, tén han ekyókxoho aqsok apkelane, hágkek eknaqtáxésamaxche m'a weykcha'áhak apagkok axta apkelwesse'e apkelwányam nak Judá. 6 Xama axta apketsapma, keñe apyaqmagkasa apteme wesse' apwányam ma'a apketche Joaquín.
7 Cháxa ekmassama axta han apteyapma apchókxa m'a wesse' apwányam Egipto, hakte apkelmomchek axta wesse' apwányam Babilonia ekyókxoho xapop apagkok, eyeynamo m'a alwáta' nak Egipto ekweykekxoho m'a wátsam Éufrates.
Joaquín yetlo apkelxegexma'a kélántekkesso m'a Babilonia
(2 Cr 36.9-10)8 Dieciocho apyeyam apagkok axta apkeynamo apteme wesse' apwányam ma'a Joaquín, apqántánxo pelten axta han apteme wesse' apwányam ma'a Jerusalén. Nehustá axta ekwesey egken, Elnatán axta apketche, eñama axta m'a Jerusalén. 9 Asagkek axta eyke ektémakxa aqsok apkelane nápaqtók Wesse' egegkok, hawók axta ektémakxa aqsok apkelane m'a apyáp axta.
10 Apketámeykegkek axta Nabucodonosor sẽlpextétamo apagkok Jerusalén, wesse' apwányam axta Babilonia xa ekhem nak, apwakhegweykmek axta yaqwayam ektamagkok. 11 Neyseksa kélchetámeyak axta han tegma apwányam apwokmo Nabucodonosor. 12 Keñe axta Joaquín, wesse' apwányam axta Judá, yetlo egken, sẽlpextétamo apkelwesse'e apagkok, apkelámha apmonye'e tén han ma'a énxet'ák ektáha axta chá'a apcháyo, apkelmeyásekpo aqsa m'a wesse' apwányam Babilonia, apkelmomchek axta han. Temegkek axta ekweykmo axta ocho apyeyam apteme wesse' apwányam ma'a Nabucodonosor.
13 Keñe axta Nabucodonosor apkelma ekyókxoho aqsok élmomnáwa ekheykegko axta m'a kañe' Wesse' egegkok tegma appagkanamap apagkok, tén han ma'a wesse' apwányam apxagkok apyawe nak, apkelekkexmeyk axta ekyókxoho aqsok élánamáxche axta sawo ekyátekto élmomnáwa, apkelánesso axta Wesse' egegkok tegma appagkanamap apagkok ma'a Salomón, wesse' apwányam axta Israel, ekhawo ektémakxa axta apxeyenma Wesse' egegkok. 14 Keñe axta apkelmoma apnaqleykekxo apyókxoho apheykha axta Jerusalén, tén han apyókxoho m'a apkelámha apmonye'e, tén han sẽlpextétamo apkelyennaqte, tén han apyókxoho m'a apkelánéyak axta chá'a aqsok, keñe han ma'a apkelánéyak nak sawo, diez mil axta apwagkassók apkelma. Méko axta eyeymomáxche enxoho m'a apchókxa, wánxa axta aqsa m'a meyke agko' nak aqsok apagkok.
15 Apnaqlákxeyk axta han apkelma Nabucodonosor ma'a Joaquín yetlo egken, apnaqteyegka'a, sẽlpextétamo apkelwesse'e apagkok, tén han ma'a énxet'ák kelwesse'e nak ma'a apchókxa. Jerusalén axta apkeleñamak apnaqlákxo apkelya'ásekxo m'a Babilonia. 16 Siete mil axta apyókxoho énxet'ák ekha kéláyo, apnaqleykekxa axta apkelma m'a wesse' apwányam Babilonia; keñe axta mil ma'a apkelánéyak axta chá'a aqsok, tén han apkelánéyak sawo, ekweykekxoho m'a apyókxoho énxet'ák apkelyennaqte, apmopwancha'a axta elempakha'. 17 Keñe axta wesse' apwányam Babilonia apteméssesa wesse' apwányam ma'a Matanías, apyaqmagkasso m'a apephénem Joaquín, apyaqmagkassessek axta han mók apwesey, Sedequías axta aptemessásekxak apwesey.
Sedequías apteme wesse' apwányam
(2 Cr 36.11-16Jer 52.1-3)18 Veintiún apyeyam apagkok axta weykmok Sedequías apkeynamo apteme wesse' apwányam, once apyeyam axta weykmok apteme wesse' apwányam ma'a Jerusalén. Hamutal axta ekwesey egken, Jeremías axta apketche, eñama axta m'a Libná. 19 Asagkek axta eyke ektémakxa aqsok apkelane nápaqtók Wesse' egegkok, hawók axta m'a ektémakxa axta aqsok apkelane m'a Joaquim. 20 Axta keñamak apkeltaqnagkama Wesse' egegkok ma'a énxet'ák nak Jerusalén tén han ma'a Judá, keñe axta apkelántekkessama m'a aphakxa nak yaqwayam melwetekxók chá'a.
© © Enxet Lengua Sur Bible © Paraguayan Bible Society, 2015.