Ekmámnaqsoho tén han negásekhayo
1 Ko'o sekteme nak sémha emonye', eyáphássessek ko'o ekxeyenma ewáxok kelán'a ektáha nak Dios apkelyéseykha, tén han ma'a étchek, cham'a sélásekhayo nak ko'o. Háwe eyke axakcha'awók ko'o sélásekhayo m'a, akke nahan ma'a apyókxoho énxet'ák apkelyekpelchágwayam nak amya'a ekmámnaqsoho. 2 Élásekhayók ko'o kéxegke eñama ekyetno egwáxok ma'a amya'a ekmámnaqsoho nak, keytek sa' nahan chá'a egwáxok meyke néxa. 3 Dios Egyáp, tén han Jesucristo aptáha nak Dios Egyáp Apketche sa' egkések kéxegke m'a ektémakxa nak segemleykekxoho, tén han ektaqmeleykha apwáxok henlano', tén han meyke ektáhakxa egwáxok, ektáha nak ekmámnaqsoho, tén han segásekhayo.
4 Awanhek axta ko'o ekpayheykekxa ewáxok sekwet'a apkelánegko nentémakxa ekmámnaqsoho nápakha étchek nak, ekhawo m'a apkeltémókxa axta antéhek Dios Egyáp. 5 Élyáxeg sélásekhayo, éltamhók ko'o kaxwók antéhek nélásekhamaxkoho. Háwe axnagkok nélánémaxchexa antéhek se'e sektáxéssesa nak kéxegke, cháxa nenxawáya axta m'a sekxók agko' axta. 6 Negásekhayo ekteme m'a nélyaheykekxoho nak ma'a apkeltémókxa nak antéhek Dios, cham'a apkeltémókxa nak antéhek Dios ma'a nélásekhamaxkoho nak, ekhawo ektémakxa axta kéllege kéxegke m'a sekxók agko' axta.
Énxet'ák sẽlyexancháseykencha'awól'a
7 Apsawheykekxók énxet apkelmopwancha'a nak hẽlyexanchesha keso náxop, mexeyenmól'a m'a apwaya axta Jesucristo apyetchásamákpoho énxet. Énxet apteme enxoho xa ektáha nak, cháxa apteme énxet apmopwána nak hẽlyexanchesha xa, tén han Apkenmexma m'a Cristo. 8 Kólleyxmakha chá'a kéxegke, yaqwayam enxoho megkamassegwomek ma'a kélwete axta ekyaqmageykekxa eñama kéltamheykha, yaqwayam enxoho kasawhaxkohok kélxawe m'a aqsok kélxawe naqsa nak.
9 Énxet ektáhakxa enxoho apmáheyo eyeykhasagkohok ma'a ektémakxa axta apkelxekmósso Cristo, metnehek apyepetcheyo m'a Dios; keñe m'a énxet ektáhakxa enxoho meyenseyam ma'a ektémakxa axta nélxekmowásamáxche eñama nak Cristo, etnehek apyepetcheyo m'a Dios Egyáp, tén han ma'a Apketche. 10 Aptemék agkok meyk'a kéxegke xama énxet, mesóko enxoho xa ektéma nak nélxekmowásamáxche eñama nak Cristo, nágkólma takha kólhések kélxagkok, nágkólpeykes nahan; 11 hakte énxet ektáhakxa enxoho appeykesso xa énxet nak, máxa appasmeykekxa etnehek apkelane m'a aqsok ekmaso.
Ektemegwánxa néxa amya'a
12 Xámok eyke aqsok yaqwayam altennaksek ko'o kéxegke, makke amakók wásenneykxak weykcha'áhak sektáxésso. Sa' aleyxek ma'a sekmeyákxo sa' kélheykegkaxa kéxegke, yaqwayam enxoho alpaqhetchesaxkohok ko'o kéxegke xa kélheykegkaxa nak, keñe sa' kayágwomhok agko' élpayheykekxa egwáxok nentáha enxoho xa.
13 Apcháphássessek nahan ekxeyenma apkelwáxok kéxegke étchek nak ma'a kélyáxa ektáha nak han Dios apkelyéseykha.
© © Enxet Lengua Sur Bible © Paraguayan Bible Society, 2015.