1 Élyáxeg sélásekhayo, cháxa ekyetnama nak negko'o sempekkencháseykekxa appeywa Dios xa. Ékeso éñamakxa eyeyméxko nak negko'o antéhek eyáxñeyo nentémakxa, móghók hempeysegkesek ma'a ekyókxoho aqsok ekpeysegkessamo nak negyókxa tén han ma'a egwáxok; anlenxanmok hana ansawhegwomok nenteme nempagkanamaxche' egagko', eñama negaye m'a Dios.
Énxet'ák Corinto apkelyaqmagkasso apkelwáxok
2 Hẽlmés negko'óxa kélwáxok. Manteméssessók chá'a negko'o xama énxet ma'a megkapayhawo nak chá'a anteméssesek; manteméssesseykmohok nahan chá'a negko'o exma ekmaso xama énxet enxoho; mantawáseykegkohok nahan chá'a negko'o xama énxet enxoho. 3 Háwe ko'o yaqwayam alxénmakha ekmaso kéxegke sektáha séláneya xa ektáha nak, hakte ektemegkek axta ko'o sélanagkama kéxegke m'a nano' axta, hakte awanhók agko' ko'o sélásekhayo kéxegke, yaqwayam enxoho aghakha chá'a xamo' egmók, tén han óletsaphok chá'a xamo' egmók. 4 Alpaqhetchesek chá'a ko'o kéxegke meyke agko' sekyexamaxkoho, chaqheykha agko' nahan ko'o ewáxok sélányo kéxegke. Ekwasqápeykekxók chá'a ko'o neyseksa m'a ekyókxoho aqsok nenlegeykegkoho nak, awanhek nahan chá'a ekpayheykekxa ewáxok.
5 Móllókasseykmok negko'o nélyampe, eyeynamo m'a sekxók axta nélweykmo m'a Macedonia, ekyókxoho yókxexma eyke chá'a negko'o negwetágweykmok ekyentaxnamo negheykha: nélnápomáxcheyk chá'a negko'o negyáwa', keñe chá'a negaye m'a kañe' egwáxok. 6 Keñe m'a Dios apkelwasqakkáseykekxoho nak chá'a m'a élleklágwayam nak, ẽlwasqakkáseykekxók axta apwaya m'a Tito; 7 háwe axta eyke ekwánxa agkok ma'a apwe, apwasqápeykekxók apagko' axta nahan kéxegke éñamakxa. Ẽltennáseykha axta nahan kélmámenyého kélagko' hek hẽlwetak negko'o kéxegke, ẽltennáseykha axta anhan éllapwámeykegkoho exnek kéxegke, tén han ektemessáseykencha'a exnek kélwáxok ko'o; Cháxa ekyánchesseykmoho nak ko'o ekpayheykekxa ewáxok xa.
8 Kelyaqhakkassessamók axta eykhe kélwáxok kéxegke m'a weykcha'áhak sektáxéssesso axta, massék eyke kaxwók eyaqha ewáxok. Chaqhegkek axta ko'o ewáxok sekweteya élyaqhakkassessamo kélwáxok kéxegke yaqwatakxoho m'a weykcha'áhak sektáxéssesso axta, 9 payhekxeyk eyke kaxwók ewáxok; háwe eyke eñama m'a sélyaqhakkassessamo axta kélwáxok kéxegke, akke m'a élyaqhapmo kélwáxok ektemessáseykekxo axta kéxegke megkólya'ásseyam ma'a Dios. Dios axta apmopmenyého katnehek kéxegke xa élyaqhapmo nak kélwáxok, axta eyke negko'o anteméssesseykmohok exma ekmaso xama enxoho kéxegke; 10 hakte cham'a ekyaqhapmo egwáxok apmopmenyého nak katnehek ma'a Dios, hegyaqmagkassesek chá'a egwáxok hegya'ásekxak ma'a nélwagkásamáxchexa nak teyp, méko nahan kaqhek egwáxok. Nétsapma eyke chá'a katekkeshok ma'a ekyaqhapmo egwáxok eñama nak keso náxop. 11 Kóllano hana ektémakxa nak élyaqhapmo kélwáxok apmopmenyého nak katnehek ma'a Dios, yaqsa aqsok ekwetassama. Naqsók axta kélteméssessók kéxegke m'a aqsok nak, élmasmeyk axta anhan ko'o; kellókassegkek axta anhan, méssegkek axta nahan kélaye. Tén axta kéltémo hélwetekxak ko'o, élmeyeykha axta nahan ko'o kéxegke, kéllegassáseykegkók axta m'a énxet ektáha axta apsexnánémap. Kélxekmóssegkek axta kéxegke megkólláneya xama enxoho xa aqsok nak. 12 Axta ko'o kaxeyenmak ewáxok énxet aptekkesso nak ekmaso tén han apkenmexamap nak, cham'a sektáxéssessama axta kéxegke m'a weykcha'áhak, wánxa axta aqsa yaqwayam kataxchek nápaqtók Dios ekyetnama ekyetnakhassamo kélwáxok negko'o. 13 Cháxa sempeykessáseykekxo nak negko'o egwáxok xa.
Yágweykmók eyke negko'o élpayheykekxa egwáxok, negweteya ekpayheykekxo apwáxok ma'a Tito; hakte kélmeyáseykekxeyk makham kéxegke kélyókxoho axnagkok apwasqápeykekxoho. 14 Nanók axta ko'o séltennasso Tito eyaqheykencha'a ko'o ewáxok kéxegke, mehélméssók nahan sekmegqakto. Naqsók axta nahan entemék ma'a nentémakxa axta negenagkama negko'o m'a Tito, ekhawo ektémakxa nak chá'a ekmámnaqsoho néltennasso kéxegke: cham'a eyaqheykencha'a nak chá'a negko'o egwáxok nenlányo kéxegke. 15 Yágweykmók nahan apkelásekhayo kéxegke ekxénweykekxoho apwáxok kélyaheykekxoho chá'a kélyókxoho kéxegke, tén han kélmoma takha' yetlo ekyawe kéláyo. 16 Awanhek ko'o ekpayheykekxa ewáxok ekyetnama ekyawe seyáyo kéxegke.
© © Enxet Lengua Sur Bible © Paraguayan Bible Society, 2015.