Néxa kélpaqhetchesso énxet'ák tén han Pablo ekxeyenma apwáxok
1 Ántánxo peyk katnehek kaxwók sekmeyeykekxa kélheykegkaxa kéxegke. Sa' kóllánekxak amya'a ektemegweykmohoxma m'a apheyncha'a enxoho apqánet essenhan apqántánxo énxet ektáha nak apkelweteykegkoho. 2 Peyk altennásekxohok ko'o makham ma'a apkeláneyak axta melya'assáxma m'a nanók axta, tén han ma'a apyókxoho énxet'ák, keso sekha nak makhawo kéxegke, ekhawo sektémakxa axta sélanagkama seyéssama, ektéma axta ánet sekweykekxa kélheykegkaxa kéxegke; ekmeyákxeyk sa' agkok ko'o makham kélheykegkaxa kéxegke, megkalepyóshek sa' alano', 3 hakte kélmenyeyk kéxegke kólwetak epaqmétek Cristo eñama seyásenneykekxa ko'o. Háwe ekyelqamáxkoho m'a apteméssessamakxa nak cha'a kéxegke appékessáseyak ma'a Cristo, apxekmóssegkek chá'a ektémakxa ekha apyennaqte kélnepyeseksa kéxegke. 4 Naqsók axta aptéma máxa apyelqamákpoho m'a kélyepetchessama axta aqsok ektegyésso, apheyk eyke makham eñama Dios apmopwána. Hawók nahan sentémakxa nak negko'o segweykekxoho m'a ektémakxa nak apyelqamákpoho, aghakha sa' eyke chá'a negko'o eñama negyepetcheykekxa m'a Cristo eñama Dios apmopwána yaqwayam enxoho anlanaksek chá'a aqsok kéxegke.
5 Kóllano hana kéltémakxa kélagko' kéxegke, yaqwayam enxoho kólya'asagkohok yennaqweykmek kexaha kélteme megkólya'ásseyam; kólyekpelchexkoho kélagko'. ¿Yagkólya'áseykegkok kéxegke aphama kélwáxok ma'a Jesucristo? ¿Enxoho axta eykel'a kólmallaneyk kéxegke ektémakxa kelyepkónamaxche'? 6 Émenyeyk ko'o kólya'asagkohok kéxegke nélmallanma chá'a negko'o sẽlyepkónma nenteme kélápháseykha ekmámnaqsoho. 7 Ólmaxnak sa' eyke chá'a negko'o Dios, yaqwayam enxoho megkóllanyek kéxegke aqsok ekmaso xama enxoho; háwe eyke yaqwayam anxekmóshok negko'o ektémakxa nélmallane chá'a sẽlyepkónma ektémakxa néltamheykha, kéxegke eyke yaqwayam chá'a kóllának aqsok ektaqmela, neyseksa eykhe kélanagko chá'a kéxegke mólmallanma negko'o m'a ektémakxa nak chá'a sẽlyepkónma néltamheykha. 8 Hakte mogwanchek negko'o anlának xama aqsok ónmexek ma'a amya'a ekmámnaqsoho nak, wánxa aqsa chá'a nempasma enxoho negko'o m'a amya'a ekmámnaqsoho nak. 9 Ékeso éñamakxa élpayheykekxo nak chá'a negko'o egwáxok nélyelqáxko enxoho chá'a, keñe kéxegke kóltéhek chá'a kélyennaqte; anlenxanmohok sa' nahan negko'o nélmaxnéssesso kéxegke yaqwayam enxoho katnégwók ekpéwomo agko' kéltémakxa'. 10 Ektáxéssessek ko'o kéxegke s'e weykcha'áhak nak amonye' sekteyánegweykekxoho kéxegke, yaqwayam sa' meynnaqtésaxkók ko'o amha ektémakxa nak sekmowána alának aqsok kélnepyeseksa kéxegke, segkésso axta m'a Wesse' egegkok, háwe eyke yaqwayam agmasséssók, yaqwayam ólyennaqtéssesek aptamhéyak melya'áseyak énxet'ák akke.
11 Élyáxeg, amonye' sélwátésso, émenyeyk ko'o kalpayhekxak kélwáxok neyseksa kélweynchámeykha, tén han kólchetmok ekpéwomo kéltémakxa. Kólwasqakkasaxchekxoho, kólteme megkólchexeymáxkoho, tén han meyke ektáhakxa kélwáxok; exek sa' chá'a kélnepyeseksa kéxegke m'a Dios segásekhayo nak tén han ma'a meyke ektáhakxa egwáxok. 12 Kólmés chá'a ekxeyenma kélwáxok kélmók yetlo kélpeykesamaxche'. Apkeláphássessek kéxegke ekxeyenma apkelwáxok apyókxoho ẽlyáxeg'a apteme nak melya'ásseyam.
13 Keytek sa' chá'a kélnepyeseksa kéxegke kélyókxoho m'a ektémakxa nak ektaqmeleykha apwáxok henlanok ma'a Wesse' egegkok Jesucristo, tén han ma'a Dios segásekhayo, tén han sempasmeykekxa nak ma'a Espíritu Santo.
© © Enxet Lengua Sur Bible © Paraguayan Bible Society, 2015.