Jotam apteme wesse' apwányam
(2 Re 15.32-38)1 Veinticinco apyeyam apagkok axta weykmok apcheynamo apteme wesse' apwányam Jotam, dieciséis apyeyam axta apteme wesse' apwányam ma'a Jerusalén. Jerusá axta ekwesey egken, Sadoc axta apketche.
2 Leklamók axta apwáxok Wesse' egegkok ektémakxa aqsok apkelane m'a Jotam, ektémakxa axta aqsok apkelane m'a Ozías, apyáp axta. Axta eyke etaxnók ma'a Wesse' egegkok tegma appagkanamap apagkok. Yágweykmók axta aqsa apkeláneyak apkeltémakxa élmasagcha'a m'a énxet'ák. 3 Jotam axta apkelane m'a átog ekyetno nak néten ma'a Wesse' egegkok tegma appagkanamap apagkok, tén han ekxámokma aqsok ekhéyak nak ma'a néten kélhaxtegkesso nepyáwa nak ma'a Ófel. 4 Apkeláneykegkek axta han tegma apkelyawe néten egkexe nak ma'a Judá, tén han tegma apkelwenaqte m'a naxma nak. 5 Apkempakhayak axta m'a wesse' apwányam nak amonitas, apyaqmásekpek axta han. Cháxa eyeynókxa axta apyánmagkasa chá'a aqsok apkelméyak amonitas xa apyeyam nak, tres mil trescientos kilos sawo ekmope, dos millones doscientos mil kilos hótáhap, hawók axta han ekwánxa m'a pók aptémakxa hótáhap. Hawók axta han chá'a apkelmésso xama m'a apqánet apyeyam nak, ekweykmoho m'a pók apyeyam.
6 Ekha kéláyo axta aptemék ma'a Jotam, hakte tásek axta aptémakxa nápaqtók Wesse' egegkok. 7 Ektémakxa axta apweynchámeykha Jotam, tén han ekyókxoho ektémakxa apmahéyak chá'a kempakhakma, tén han aqsok apkelane, hágkek eknaqtáxésamaxche m'a weykcha'áhak apagkok axta m'a apkelwesse'e apkelwányam nak Israel tén han Judá.
8 Veinticinco apyeyam apagkok axta weykmok apcheynamo apteme wesse' apwányam Jotam, dieciséis apyeyam axta apteme wesse' apwányam ma'a Jerusalén. 9 Xama axta apketsapma, kélátawanyegwákxeyk axta m'a kélátawanyamakxa axta apyapmeyk nano', cham'a David Tegma Apwányam apagkok. Tén axta apyaqmagkassama apteme wesse' apwányam ma'a apketche Ahaz.
© © Enxet Lengua Sur Bible © Paraguayan Bible Society, 2015.