1 Xama axta apwákxo Roboam ma'a Jerusalén, apchánchesákxeyk axta ciento ochenta mil sẽlpextétamo, ektáha axta kélyéseykha nepyeseksa m'a apyókxoho Judá apnámakkok, tén han ma'a Benjamín apnámakkok, yaqwayam elnapakpok ma'a énxet'ák Israel, tén emekxak ma'a apchókxa'. 2 Appaqhetchessek axta eyke Wesse' egegkok ma'a Semaías, apteme axta Dios énxet apagkok. Aptáhak axta apcháneya s'e: 3 “Eltennés sa' Roboam, apketche nak Salomón, wesse' apwányam nak yókxexma Judá, tén han ma'a apyókxoho israelitas apheykha nak Judá tén han ma'a Benjamín apchókxa, 4 séltamho ko'o melnapakpehek ma'a apkelpeywomo xamo' nak. Tásek eltaqhekxak aqsa apxanák ma'a apyókxoho nak, hakte cháxa séltamhókxa nak ko'o etnahágkok xa.”
Xama axta apkelleg'a aptáhakxa apkeláneya m'a Wesse' egegkok, apkeltaqhákxeyk axta apxanák, massék axta apmáheyo elnapakpok ma'a Jeroboam aphawóxama.
Roboam ekxámokma aqsok apagkok
5 Apheykmek axta Roboam ma'a Jerusalén, keñe apkeláneykekxo tegma apkelyawe élyennaqte kélhaxtegkesso nepyáwa m'a Judá. 6 Apkelánekxeyk axta Belén, Etam, Tecoa, 7 Bet-sur, Socó, Adulam, 8 Gat, Maresá, Zif, 9 Adoraim, Laquis, Azecá, 10 Sorá, Aialón tén han ma'a Hebrón, cháxa tegma apkelyawe élyennaqte axta kélhaxtegkesso m'a Judá tén han Benjamín apchókxa. 11 Apkelánekxeyk axta kélhaxtegkesso élyennaqte, apkelyésáha axta han chá'a apkelámha apmonye'e yaqwayam elanha m'a, apxatmeyk axta han ma'a nento, pexmok égmenek tén han anmen yámet égmenek. 12 Apkelmeyásegkek axta han kéláhakkásamáxche' yetlo sawhéwa m'a apyókxoho tegma apkelyawe, ekyennaqte agko' kélláneykha axta aptemessásak. Apagkok axta aptamhákxak Roboam ma'a Judá tén han Benjamín.
13 Apyókxoho axta apkelwa'ak apkelmaxnéssesso Dios énxet'ák apagkok tén han levitas, apkeleñama mók nekha, apheykha nak ma'a Israel, yaqwayam epasmekxak ma'a, 14 hakte apyamasmeyk axta xapop apagkok ma'a levitas ektaqmelakxa axta pa'at, tén han ma'a mók xapop apagkok, apmáheyo elmahagkok ma'a Jerusalén tén han ma'a mók yókxexma nak Judá, hakte apkelwátessáseykegkek axta Jeroboam, tén han ma'a yaqwayam nak eyaqmagkasek apteme wesse' apkelwányam, apkeltamheykha aptamhéyak apkelmaxnéssesso Wesse' egegkok énxet'ák apagkok. 15 Apkelyéseykha axta han Jeroboam yaqwayam etnahagkok apkelmaxnéssesso aqsok kéláyókxa m'a kélpeykessamókxa nak, tén han kélpeykessamókxa m'a kelyekhama', keñe han ma'a weyke étkók kéleykmássesso apkeltémo axta kóllanaksek. 16 Keñe m'a apteméssesso axta naqsók apmáheyo ektamok ma'a Wesse' egegkok, Dios apagkok nak Israel, aptamheykegko m'a aptamheykegkaxa axta apkelmaxnéssesso Dios énxet'ák apagkok, tén han levitas, apkelmeyákxeyk axta m'a Jerusalén, yaqwayam elmések aqsok apkelnapma m'a Wesse' egegkok, Dios apagkok axta m'a apyapmeyk nano'. 17 Cháxa apyennaqteyáseykekxo axta apchókxa Judá, appasmeykekxo m'a Roboam, Salomón axta apketche, ekweykmoho apqántánxo apyeyam, hakte apqántánxo apyeyam axta apkelyetleykekxak ma'a aptémakxa axta David tén han Salomón.
18 Apmomchek axta Roboam aptéma aptáwa' m'a Mahalat, Jerimot axta apketche kelwána, cham'a Jerimot David axta apketche tén han Abihail, apketche kelwána axta m'a Eliab, Jesé axta aptáwen kelwána. 19 Keso apketchek axta Roboam tén han Mahalat se'e: Jehús, Semarías tén han Záham. 20 Keñe axta apmoma han ma'a Maacá, Absalón axta apketche kelwána, keso apketchek axta s'e: Abiam, Atai, Zizá tén han Selomit. 21 Dieciocho axta ekyókxoho apnaqteyegka'a m'a Roboam, keñe sesenta m'a apkelmeykha naqsa, Maacá axta eyke aqsa chá'a apchásekhayók apagko', neyseksa m'a ekyókxoho nak. Veintiocho axta apyókxoho apketchek apkelennay'a, keñe sesenta m'a apketchek kelwán'ák.
22 Abiam axta apteméssessók apkemha apmonye' Roboam nepyeseksa m'a apketchek, étche apkenna nak Maacá, hakte apmenyeyk axta etnéssesek wesse' apwányam. 23 Apya'áseykegkók axta han apmáheyókxa etnéssesek yexpánchesek apketchek ma'a ekyókxoho kañe' xapop nak Judá, tén han Benjamín, keñe han ma'a nepyeseksa nak apyókxoho tegma apkelyawe élyennaqte nak kélhaxtegkáseyak nepyáwa', apkelmeyáseykegkek axta ekxámokma aptéyak, apkelwetassegkek axta han ekxámokma m'a apnaqteyegka'a.
© © Enxet Lengua Sur Bible © Paraguayan Bible Society, 2015.