Nentémakxa ekleklamo nak apwáxok Dios
1 Élyáxeg, néltennássek negko'o kéxegke yetlo nenxeyenma apwesey Wesse' egegkok Jesús néltamho kóllenxanmohok kéllane m'a nentémakxa axta nélxekmósso kéxegke, yaqwayam enxoho kalkohok apwáxok Dios kéltémakxa, ekhawo nak kéltémakxa se'e kaxwo' nak.
2 Kélya'ásegkok kéxegke néltémókxa axta kóltéhek eñama m'a apkeltémókxa nak antéhek Wesse' egegkok Jesús. 3 Apmenyeyk kéxegke Dios kóltéhek kélpagkanamaxche', mopmenyeyk kóllának kélxama kéxegke m'a ekmeyámáxchexa nak antéhek negmeykha mansexta, 4 apmenyeyk nahan Dios agya'asagkohok negko'o nentémakxa nentaqmelchásamáxkoho xamo' entáwa', yetlo nempagkanchásamáxche Dios, tén han meyke nentémakxa nápaqta'awók énxet'ák, 5 háwe m'a yetlo negmáheyo egagko' nak anlának nentémakxa mansexta, tén han ekmaso, aptamheykegkaxal'a chá'a m'a énxet'ák melya'áseyak nak Dios. 6 Nágkóltawasagkoho aqsa kélmók essenhan kólyexanchesha kóllanaksek xa ektéma nak aqsok, hakte asagkek agko' chá'a katnehek senlegassáseykegkoho Wesse' egegkok eñama nenlane xa ekyókxoho nak, ekhawo nentémakxa axta néltennasso kéxegke. 7 Hakte axta hẽlwóneykha negko'o Dios yaqwayam antéhek ekmanyása nentémakxa, ektaqmalma nentémakxa axta aqsa. 8 Énxet ektáhakxa enxoho aptaqnagko xa nélxekmowásamáxche nak, metaqnaweyk ma'a xama énxet enxoho, wánxa m'a Dios apteme axta apmésso kéxegke Espíritu Santo apagkok.
9 Keñe m'a ektémakxa nak nélásekhamaxkoho nepyeseksa élyáxeg'a, megkeyméxchek ko'o atáxéssesek kéxegke, hakte Dios apagko' axta apkelxekmósso kéxegke ektémakxa nak kélásekhamaxkoho. 10 Cháxa kéltéméssessamakxa nak chá'a kéxegke apyókxoho m'a ẽlyáxeg'a apheykha nak ekyókxoho yókxexma Macedonia. Élyáxeg, néltamhók eyke negko'o kólyánchesagkohok kélásekhamaxkoho. 11 Kóllenxánem chá'a kóltéhek meyke ektáhakxa kélheykha, tén han kóllának chá'a m'a aqsok ekpayhémo nak chá'a kéllane, kóllánho chá'a kélagko' kéltamheykha ekhawo néltémókxa axta kóltéhek, 12 yaqwayam enxoho etnehek chá'a apcháyo m'a énxet'ák apkeleñama nak mók nekha, keñe megkólásenneykxeyk chá'a kéxegke m'a xama énxet enxoho.
Wesse' egegkok apkexyeyam
13 Ẽlyáxeg, mogmenyeyk negko'o kóltéhek kéxegke meyke kélya'áseykegkoho ektémakxa nak chá'a m'a énxet'ák apkeletsapma axta, yaqwayam enxoho megkallapwomagkek kéxegke, ektamheykegkaxa nak chá'a m'a énxet'ák meyke nak apkelhaxanma yaqwayam exnók xamo' ma'a Dios. 14 Magya'ásseykmok negko'o apketsapma axta Jesús tén han ma'a apxátekhágweykmo axta, cháxa keñamak magya'ásseykmo nak han peya enaqxétekhássók Dios xamo' Jesús ma'a énxet'ák apkeletsapma apteme axta melya'ásseyam.
15 Cháxa keñamak nentáha nak negko'o negáneya kéxegke xa, ektéma nak Wesse' egegkok nélxekmowásamáxche apagkok, negko'o nenteme nak negheykha makham ekweykmoho m'a apweyktamxa sa' Wesse' egegkok, mehẽlteméssesek sa' negko'o egmonye'e. Sa' eyke m'a apkeletsapma axta. 16 Hakte kañexchek sa' ekyennaqte kélpeywa, cham'a appeywa nak apkemha apmonye' Dios apchásenneykha, tén han ekpáwà m'a Dios apchaqkahasso, Wesse' egegkok apagko' sa' nahan eweywenták apkeñama m'a néten. Apmonye'e sa' nahan enaqxétekhágwók ma'a énxet'ák apkeletsapma apteme axta melya'ásseyam Cristo; 17 keñe sa' negko'o nélyenna nak makham, hẽlnaqlakxohok sa' xamo' neyseksa yaphope xa énxet'ák nak, yaqwayam antahanyohok xamo' Wesse' egegkok ma'a néten; keñe sa' aghakha chá'a xamo' Wesse' egegkok megkatnégwayam néxa. 18 Kólwasqakkásekxoho chá'a kélnámakkok kóllegaksek xa amya'a nak.
© © Enxet Lengua Sur Bible © Paraguayan Bible Society, 2015.