Pablo ekxeyenma apwáxok ektémakxa axta aptamheykha Tesalónica
1 Élyáxeg, kéxegke kélagko' kélteme kélya'áseykegkoho megkatnaha eyaqhémo m'a nélweykmo axta kélheykegkaxa kéxegke. 2 Kélya'ásegkók nahan kéxegke ektémakxa axta chá'a negko'o néltaqnómaxche tén han sẽlnaqtawáseykegkoho m'a Filipos, empasmomchek axta negko'o Dios yaqwayam anlegaksek kéxegke m'a appeywa, yetlo meyke negaye, tén han neyseksa ekyawe agko' sẽlenmexeykha. 3 Hakte negya'áseykegkók axta negko'o megkeytnakhágweykmo m'a néltenneykha, yetlo ektaqmalma élchetamso egwáxok axta nahan chá'a néltenneykha, axta nahan kaxeyenmak egwáxok ólyexanchesha xama énxet enxoho. 4 Ẽlyepkónmeyk axta negko'o sekxók Dios, tén axta segméssama yaqwayam antéhek néltenneykha tásek amya'a, cháxa néltenneykencha'a nak chá'a negko'o xa. Manlenxáneykmok chá'a negko'o ólpeykessásekxak apkelwáxok ma'a énxet, wánxa m'a Dios apkelányo nak chá'a egwáxok. 5 Kélya'áseykegkók nahan kéxegke, megkataqmeleykencha'a chá'a negko'o nempeywa anxének kéxegke, magásenneykekxak nahan chá'a negewagkeykha nak nempeywa yaqwayam enxoho hẽlmések selyaqye kélagkok. Dios akke apya'ásegkók xa. 6 Axta negko'o agketamsók xama enxoho yaqwayam hegáwhok ma'a énxet'ák, kéxegke, tén han ma'a pók énxet'ák nak. 7 Egwanchek axta eykhe negko'o agásenneykxak ma'a ektémakxa nak ekha sẽlyaheykekxoho eñama nenteme Cristo apkelápháseykha, máxa sakcha'a axta eyke negko'o nentamheykegkok kélnepyeseksa kéxegke, cham'a ektémakxal'a egken éktegkesso étchek, tén han éltaqmelchesso m'a étchek ancha'awo nak. 8 Awanhek axta negko'o nélásekhayo kéxegke, háwe axta ekwánxa agkok negmámenyého agmések kéxegke m'a tásek amya'a eñama nak Dios, weykmók axta magmeyágweykekxa negyókxa yaqwayam antekyók. ¡Awanhók agko' axta nélmámenyého kéxegke! 9 Élyáxeg, kélya'ásegkok kéxegke ektémakxa axta negko'o néltamheykha, tén han nélwasqápeykekxoho yaqwayam antókasaxche'. Néltamheykha axta chá'a negko'o yókxoho ekhem tén han ekyókxoho axta'a, yaqwayam enxoho mólhekxék kéxegke neyseksa nenlegasso m'a amya'a eñama nak Dios.
10 Kéxegke kélteme kélya'áseykegkoho, tén han Dios, nenteme negko'o eyáxñeyo nentémakxa, tén han ekpéwomo meyke sẽlxéncháseykekxoho kélnepyeseksa kéxegke kélteme nak megkólya'ásseyam. 11 Kélya'ásegkok nahan kéxegke nenteméssessama axta kéxegke apteméssessamakxal'a elának apketchek apagko' ma'a énxet. 12 Nélwasqakkáseykekxók axta, néltaqmelchessáseykekxeyk axta kélwáxok, néltennassegkek axta nahan néltémo kóltéhek ma'a eyéméxchexa nak antéhek nenteme nak Dios énxet'ák apagkok, apkelwóneykencha'a axta apkeltémo kawakxohok ma'a aptémakxa nak Wesse' apwányam, tén han ma'a ektémakxa nak apcheymákpoho.
13 Cháxa keñamak negméssama nak chá'a negko'o ekxeyenma egwáxok ma'a Dios, hakte xama axta kéllegaya kéxegke m'a amya'a eñama Dios néltennáseykencha'a axta negko'o kéxegke, naqsók axta kéltemessessók ekteme amya'a eñama Dios, háwe m'a amya'a eñama nak énxet. Naqsók ekteme amya'a eñama Dios xa ekyaqmagkassessama nak kéltémakxa kéxegke kélteme nak megkólya'ásseyam. 14 Élyáxeg, hawók axta ektémakxa Dios énxet'ák apagkok ektáha nak han Cristo Jesús énxet'ák apagkok apheykha nak ma'a Judea, ektémakxa axta kéllegeykegkoho kéxegke kélnaqtawáseykegkoho, apnaqtawáseykegkoho axta m'a kélpeywomo xamo' nak. Apmenxeneykha axta nahan appeywomo xamo' judíos ma'a. 15 Cháxa judíos apchaqhama axta m'a Wesse' egegkok Jesús, ekhawo aptamheykegkaxa axta anhan apkelnapma m'a apkellegasso axta Dios appeywa, ẽlántekkessegkek axta anhan negko'óxa. Mepeykessáseykekxak chá'a apwáxok ma'a Dios, apyókxoho énxet nahan chá'a apkelenmexeykha. 16 Negmakók agkok chá'a negko'o óltennasha amya'a m'a metnaha nak judíos yaqwayam enxoho nahan elwagkasakpok teyp, mehéghók chá'a. Cháxa aptamheykegkaxa nak chá'a apyáncháseykegkoho m'a melya'assáxma. Wa'ak eyke kaxwók yaqwayam ellegássesagkohok ekmaso agko' Dios xa énxet'ák nak.
Pablo apmáheyo emyekxak makham apheykegkaxa énxet'ák Tesalónica
17 Élyáxeg, xéneykha axta chá'a negko'o egwáxok kéxegke, axta eykhe ólweteyk, awanhek axta néltémo ólwakxak kélheykegkaxa yaqwayam ólwetekxa', cham'a negkexeykekxo axta yaqwatakxoho. 18 Nenlenxáneykmek axta eykhe ólxog; ko'o Pablo, hágkaxwe axta amáwhok axog, Satanás axta eyke mehéghayo'. 19 ¿Yaqsa segmésso negko'o nélhaxneykha, ekpayheykekxa egwáxok tén han ektaqmeleykha egwáxok nápaqtók Wesse' egegkok Jesús, cham'a apkexyekmo sa'? Kéxegke, háwe pók énxet. 20 Naqso', kéxegke kélteme ektaqmeleykha nélpeywa nenxeyenma kéxegke, tén han ekpayheykekxa egwáxok.
© © Enxet Lengua Sur Bible © Paraguayan Bible Society, 2015.