Ekxeyenma egwáxok
1 Ko'o Pablo, Silvano, tén han Timoteo. Negaphássessek negko'o ekxeyenma egwáxok énxet'ák melya'ásseyam apheykha nak Tesalónica apkelyepetcheykekxa nak Dios Egyáp tén han Wesse' egegkok Jesucristo. Dios sa' epekkenek kélnepyeseksa kéxegke m'a ektémakxa nak segmésso naqsa ektaqmeleykha apwáxok henlano' tén han ma'a meyke ektáhakxa egwáxok apagkok.
Negmésso ekxeyenma egwáxok Dios
2 Agméshok chá'a negko'o ekxeyenma egwáxok Dios kéxegke éñamakxa, kaxének chá'a egwáxok ma'a nentáha enxoho nempeywa nélmaxnagko. 3 Megkamassegweykmok chá'a negko'o ekxeyenma egwáxok kéxegke nápaqtók Dios Egyáp, cham'a ektémakxa nak chá'a kélláneyak aqsok eñama megkólya'ásseyam, tén han kéltamheykha ektekkesso nak kélásekhamaxkoho, tén han kélwasqapma kéllegeykegkoho kélhaxanma m'a Wesse' egegkok Jesucristo. 4 Élyáxeg, apkelásekhayo nak Dios, negya'ásegkók negko'o apkelyéseykencha'a kéxegke m'a. 5 Hakte cham'a nenlegassama axta negko'o kéxegke m'a tásek amya'a, háwe axta m'a amya'a naqsal'a, yetlo Dios apmopwána axta eyke tén han Espíritu Santo aptamheykha, tén han yetlo negya'áseykegkoho ektáha ekmámnaqsoho xa amya'a nak. Kélya'ásegkók kéxegke nentémakxa axta chá'a negko'o kélnepyeseksa kéxegke, negketagkassama yaqwayam kapasmok kéxegke.
6 Keñe axta kéxegke kélyetleykekxo m'a nentémakxa axta negko'o, tén han ma'a aptémakxa nak Wesse' egegkok, kélmomchek axta takha' amya'a ektaqmela yetlo ekpayheykekxa kélwáxok, apméssama axta chá'a kéxegke m'a Espíritu Santo, neyseksa ekyawe kéllegeykegkoho. 7 Axta keñamak kéltéma kéxegke yaqwayam elyetlakxak kéltémakxa m'a apyókxoho ekha nak melya'ásseyam ma'a apheykha nak yókxexma Macedonia tén han Acaya. 8 Kéxegke axta keñamak ekpayheykekxo m'a Wesse' egegkok appeywa, háwe axta ekwánxa agkok ma'a Macedonia tén han ma'a Acaya, sawheykekxók axta ekyókxoho yókxexma, kélya'ásegkók axta nahan kéxegke ekyetnama megkólya'ásseyam ma'a Dios, cháxa keñamak megkeyméxko nak negko'o óltennásekxohok makham. 9 Apkelxeyenma apancha'awók axta eyke sẽlmoma takha' negko'o kéxegke xa énxet'ák nak, tén han apkelxeyenma kéxegke ekmassama kélpeykessamo m'a aqsok kéleykmássesso, kélya'eykekxo kaxwók ma'a Dios memassegwayam apmámnaqsoho nak, yaqwayam enxoho kóltamhagkok apkeláneykha, 10 tén han kólleyxek éxyók apkeñama néten ma'a Jesús apkenyekta néten, Dios Apketche, apxátekhásseykmo axta nepyeseksa apkeletsapma. Jesús apteme sẽlwagkasso teyp neyseksa sẽllegassáseykegkoho ekmaso peya nak kawa'.
© © Enxet Lengua Sur Bible © Paraguayan Bible Society, 2015.