Filisteos apyenseykekxa makham yántéseksek
1 Siete pelten axta ekyetnayam filisteos apchókxa m'a Wesse' egegkok yántéseksek apagkok. 2 Apkeláneyáha axta filisteos ma'a apkelmaxnéssesso nak chá'a aqsok kéláyókxa énxet'ák agkok, tén han ma'a ekha nak apkelmopwancha'a. Aptáhak axta apkeláneya s'e:
—¿Háxko sa' anteméssesek Dios yántéseksek apagkok? Hẽltennés hana, háxko antéhek agyensakxak makham ma'a ekyetnamakxa axta.
3 Aptáhak axta apkelátegmowágko:
—Peyk sa' agkok kólyensakxak makham ma'a Dios Israel nak yántéseksek apagkok, nágkólaphés aqsa meyke kélyetlókassamo xama aqsok, kólmés sa' ekyaqmageykekxa kélsexnánémaxche' m'a Wesse' apagkok. Keñe sa' kóltaqmelekxak makham kéxegke, kólyekpelchágwok sa' ektémakxa melwátesseykmo apkellegassáseykegkoho.
4 —¿Yaqsa sa' agmések ekyaqmageykekxa nélsexnánémaxche'? —axta aptáhak apkelmaxneyáncha'a m'a filisteos.
—Cinco tasqapma étkók kéleykmassáseykha sa' kólmések élánamáxche nak sawo ekyátekto ekmomnáwa —axta aptáhak apkelátegmowágko m'a apkelmaxnéssesso nak chá'a aqsok kéláyókxa énxet'ák agkok—, xama apkemha apmonye' filisteos sa' chá'a; keñe sa' han cinco pomo'o kéleykmássesso élánamáxche nak sawo ekyátekto ekmomnáwa, hakte hawók mók kéxegke kéllegeykegkoho xa aqsok ekmaso nak, ekweykekxoho apkelámha apmonye'e kélagkok. 5 Kóleykmássesha sa' tasqapma, tén han pomo'o aptawáseykencha'a nak negókxa, kóltemésses apcheymákpoho m'a Dios nak Israel; lapmaxcheyk sa' kamassegwók apkellegassáseykegkoho kéxegke, keñe han ma'a aqsok kéláyókxa nak chá'a, tén han kélókxa nak kéxegke. 6 ¿Yaqsa ektéma kéxegke élyennaqtama nak kélwáxok, aptamheykegko axta m'a egipcios tén han faraón? Eyápaqhágweykmo axta apchahayo apkelánteyapma israelitas, apkellegassáseykegkoho ekyentaxno agko' Dios nak Israel. 7 Kólána kéxegke kalanaxchek weyke ekyenyawasso axnagko'; kólma sa' ánet weyke kaxwe ektamhéyak naqláwa, meyke nak kélchexenchesso makham nagyétek yámet, kólnaqtehetches sa' ma'a ekyenyawasso nak; nágkólho aqsa kalyetlók ma'a étkók nak, kólxatmekxa sa' aqsa m'a kañe' axagkok nak. 8 Kólma sa' Dios yántéseksek apagkok, kólpekken sa' ma'a néten nak weyke ekyenyawasso, kólpekken sa' nekha m'a kélxata nak aqsok élánamáxche sawo ekyátekto ekmomnáwa, yaqwayam nak kóltéhek ekyaqmageykekxa kélsexnánémaxche'. Keñe sa' kólhok aqsa kaxog axakko' xa weyke ekyenyawasso nak. 9 Kóllanha sa': péwók sa' agkok ekmeyákxo weyke ekyenyawasso m'a Bet-semes, éñamakxa axta, eyke xa ektáha senteméssesso negko'o m'a Dios apagkok nak Israel xa aqsok ekmaso nak; sa' agkok kapéwók ma'a, agya'asagkohok sa' megkatnaha sẽllegassáseykegkoho m'a, senteme egagko' eyke.
10 Aptamhágkek axta han xa énxet'ák nak. Apkelmágkek axta ánet weyke kaxwe ektamhéyak naqláw'ák, xama axta apxátaweykekxo étkók ma'a kañe' axagkok nak, apnaqtehetchessek axta m'a ekyenyawasso nak; 11 tén axta appekkena néten weyke ekyenyawasso m'a Wesse' egegkok yántéseksek apagkok, yetlo m'a kélxata axta chá'a kéleykmassáseykha pomo'o, tén han tasqapma, élánamáxche nak sawo ekyátekto ekmomnáwa. 12 Keñe axta élxega weyke élpéwo m'a ámay ekmahéyak nak Bet-semes, kelpáwágkek axta aqsa, kelpéwók axta aqsa han élxega meyke élyetnakhágwayam. Apkelxegkek axta natámen ma'a apkelámha apmonye'e nak filisteos, ekweykmoho m'a eyeynókxa axta xapop Bet-semes. 13 Xama axta apkelenmexawo m'a énxet'ák apheykha nak Bet-semes, apyaqtennágko axta hótáhap ma'a ekyapwátegweykenxa nak xapop, kelpayhékxók agko' axta apkelwáxok apkelwet'a m'a Wesse' egegkok nak yántéseksek apagkok. 14 Xama axta ekwákxo weyke ekyenyawasso m'a yókxexma apagkok nak Josué, apha axta Bet-semes, yetnakmek axta. Yetnegkek axta han meteymog ekyawe agko' ma'a. Yántápak axta han aptemessásekxak énxet'ák Bet-semes ma'a yántéseksek agkok nak weyke ekyenyawasso, keñe axta weyke apkelwatnésa Wesse' egegkok. 15 Nanók axta eyke aptekkesa levitas ma'a yántéseksek nak, tén han ma'a kélxata axta sawo ekyátekto ekmomnáwa kéleykmassáseykha, apnegkenwokmek axta néten meteymog ekyawe; cháxa ekhem apkelwatnésakxa axta han aqsok Wesse' egegkok ma'a énxet'ák apheykha nak Bet-semes, tén han apkelnáhakkasa chá'a aqsok apnaqtósso. 16 Apkeltaqháwok axta makham cinco apkelámha apmonye'e axta filisteos apkelmeyákxo Ecrón xa ekhem nak, natámen apkelwete xa.
17 Cháxa cinco kéleykmássesso tasqapma élánamáxche axta sawo ekyátekto ekmomnáwa, apkelmésso axta Wesse' egegkok ma'a filisteos, ekyaqmageykekxa m'a apkelsexnánémap, xama xama axta han chá'a agkok: cham'a Asdod, Gaza, Ascalón, Gat tén han Ecrón; 18 keñe axta m'a apwánxa axta pomo'o kéleykmassáseykha, hawók axta apwánxa m'a tegma apkelyawe apagkok xa cinco apkelámha apmonye'e nak filisteos, ekweykekxoho m'a tegma apkelyawe apkelyennaqte nak, tén han ma'a tegma apketkok meykexa nak kélhaxtegkesso nápakhaw'ék. Cham'a meteymog ekyawe kélpekkenmakxa axta néten Wesse' egegkok yántéseksek apagkok, egwanchek makham agwetak ma'a Josué nak yókxexma apagkok, apha axta m'a Bet-semes.
19 Apkelnapmeyk axta eyke han nápakha énxet'ák Bet-semes ma'a Wesse' egegkok, eñama apkelányo m'a kañe' yántéseksek. Setenta énxet'ák axta apkelnapmak, apkellekxagweykha axta énxet'ák, eñama apkelnapma Wesse' egegkok nepyeseksa m'a énxet'ák. 20 Keñe axta aptéma apkelpaqmeyesma apheykha nak Bet-semes: “¿Yaqsa awanchek katnamha nápaqtók ma'a Wesse' egegkok, cham'a Dios appagkanamap nak? ¿Háxko sa' agáphaksek yántéseksek apagkok yaqwayam enxoho keytnók makhawo'?” 21 Keñe axta kéláphássesa amya'a m'a apheykha nak Quiriat-jearim, ektáha apkeláneyákpo s'e: “Apyensa'akteyk makham filisteos Wesse' egegkok yántéseksek apagkok; kólwata sa'.”
© © Enxet Lengua Sur Bible © Paraguayan Bible Society, 2015.