Filisteos aptaqnagko David
1 Apchánchesákxeyk axta apyókxoho sẽlpextétamo apagkok filisteos ma'a yókxexma nak Afec, keñe israelitas apkelpakxenwa'a m'a ekteyapmakxa nak yegmen, ekyetnama nak Jezreel. 2 Xama axta apkelxega m'a apkelámha apmonye'e nak filisteos, yetlo apkelxegexma'a m'a sẽlpextétamo apxámokma, keñe axta David yetlo apkelxegexma'a, apxega han xamo' axayók ma'a Aquís. 3 Keñe axta m'a apkelámha apmonye'e nak filisteos, aptáha apkelmaxneyáncha'a m'a Aquís:
—¿Yaqsa apkelánegko hebreos se'e?
Aptáhak axta Aquís apchátegmowágko s'e:
—David se'e, Saúl axta sẽlpextétamo apkemha apmonye' apagkok, wesse' apwányam axta m'a Israel. Yáma wegqak eyke han apyeyam apteme sekxegexma, mót'ak makham xama aqsok ekmaso apkelane, eyeynmo m'a sekxók axta sépetchegwaya, ekwokmoho makham se'e kaxwo' nak.
4 Aptaqnókkek axta eyke apkelámha apmonye'e filisteos ma'a Aquís, axta aptáhak apcháneya s'e:
—Yána elmeyekxak ma'a yókxexma apméssamakxa axta, nágyána han hẽlyetlók kempakhakma; hẽlenmexekxa katnehek neyseksa némpakhe. ¡Yásekhekxohok katnehek makham wesse' apagkok elsakxések apqatkok apkelyaqténcháseyak se'e sẽlpextétamo egagkok! 5 ¡David neykhe s'e, kélmeneykmássessama axta neyseksa ekneywomáxche' kéltéma kélanagkama s'e: ‘Mil énxet apkelnapmak Saúl, keñe David apkelnapma diez mil énxet!’
6 Keñe axta Aquís apwóneyncha'a m'a David, aptáhak axta apcháneya:
—¡Naqsók ko'o ekteméssásak yetlo sekxeyenma Wesse' egegkok memassegwayam, xép apteme énxet ekpéwomo aptémakxa! Leklamók han ewáxok aptémakxa nak chá'a exchep neyseksa negheykha m'a apheykegkaxa nak sẽlpextétamo egagkok. Mateyk ko'o xama enxoho aqsok ekmaso apkelane, eyeynmo m'a sekxók axta sey'áya. Akke kalchak apkelwáxok ma'a apkelámha apmonye'e nak filisteos, 7 etaqhoho sa' kaxwók meyke ektamheykha apwáxok, yaqwayam enxoho melanyek xama aqsok megkaleklo nak apkelwáxok ma'a.
8 Apchátegmowágkek axta David:
—¿Yaqsa aqsok ko'o sélana? ¿Yaqsa aqsok apweteya ko'o séláneya neyseksa sekha xamo' xép megya'awo nak alnapaxchek ma'a apkelenmexma nak?
9 Keñe axta Aquís aptáha apchátegmowágko:
—Ekya'ásegkók ko'o exchep apteme mehegyenyaweykha apagko', máxa m'a xama Dios apchásenneykhal'a, makke eltamhok xép hẽlyetlók ómpakhak ma'a apkelámha apmonye'e nak filisteos. 10 Kólnaqxétekhák sa' axto'ók agko', xép tén han ma'a Saúl axta apkeláneykha, apkelyetláyam axta exchep, kelsakak sa' agkok, kóltaqhohok sa'.
11 Axto'ók agko' axta apxatakha'a David yetlo apkelxegexma'a, keñe axta apkeltaqháwo makham ma'a filisteo apchókxa', tén axta filisteos apkelmahágko m'a Jezreel.
© © Enxet Lengua Sur Bible © Paraguayan Bible Society, 2015.