David apxegányam apmeyeykekxa Nob
1 Apmahágkek David yókxexma Nob apya'aweykxo apkelmaxnéssesso Dios énxet'ák apagkok Ahimélec. Apyegwakkek axta han apwet'a, keñe aptáha apcháneya s'e:
—¿Yaqsa ektáha apwa'a nak apxakko' meyke apxegexma?
2 Apchátegmowágkek axta David:
—Wesse' apwányam xeyk ko'o seyáphasso, apkeltamhók xeyk han maxének apkeltamhókxa alának aqsok. Éltennássek xeyk eyke yókxexma yaqwánxa ólwetaxchek ma'a sélxegexma'a nak. 3 ¿Yaqsa apto ekyetna? Hélmés ko'o cinco pán, essenhan ma'a ekyetnakxa enxoho aqsok.
4 Apchátegmowágkek axta apkelmaxnéssesso Dios énxet'ák apagkok:
—Pán apkelpagkanamap akke ko'o apyetna nak, háwe m'a pán kéllanel'a aqsa. Almések sa' eyke melpathetágko enxoho apkelxegexma'a kelán'a m'a axta'a exchek.
5 Apchátegmowágkek axta David:
—Mólpathetagkehek eyke chá'a negko'o kelán'ák amonye' nélxega negya'áyam kempakhakma. Kaláxñohok eyke chá'a apyempe'ék sélxegexma'a nélxega enxoho chá'a, nentémakxa nak chá'a ólxog, ekyagwánxa agkok éláxña'awo apyempe'ék se'e kaxwo' nak.
6 Keñe axta apkelmésa pán apkelpagkanamap ma'a apkelmaxnéssesso Dios énxet'ák apagkok, hakte wánxa axta han pán ma'a kélpagkanchesso axta Wesse' egegkok, cháxa kélhaxyawasakxa axta han ma'a néten nak ekwatnamáxchexa aqsok kélyaqmagkasa m'a pán kaxwe apmakhetma nak. 7 Aphegkek axta han xama Saúl apkeláneykha m'a, apheykekxa axta yaqwayam elának aptamheykha m'a kélpakxanma appagkanamap. Doeg axta han apwesey, apteme axta edomita, apkemha apmonye' axta apkeláneseykha Saúl apnaqtósso nepkések.
8 Aptáhak axta David apcháneya Ahimélec se'e:
—¿Yetnéya sawhéwa, essenhan xama sókwenaqte apagkok? Epekhéssek xeyk ko'o wesse' apwányam, la'a mamákxo sókwenaqte ahagkok, tén han ma'a mók sélmeykha nak chá'a.
9 Aptáhak axta apchátegmowágko apkelmaxnéssesso Dios énxet'ák apagkok:
—Yetneyk ma'a Goliat axta sókwenaqte apagkok, cham'a filisteo apchaqha axta exchep ma'a ekyapwátegweykenxa nak xapop Elá. Cháxa ekyetna xa teyp nak efod, kélpextete nak apáwa. Esakxa sa' apmako enxoho esakxa'; hakte wánxa ekyetna xa, méko mók.
Apchátegmowágkek axta David:
—Méko ekhawo ektaqmalma xa. Hegkés.
10 Apkenyahákxeyk axta makham David apyexánegkesa m'a Saúl, apyo'ókmek axta m'a Aquís, wesse' apwányam axta m'a Gat. 11 Keñe axta m'a Aquís apkeláneykha aptáha apkelpaqmeta s'e:
—¡David neykhe xa, Saúl apchásenneykhal'a, wesse' apwányam nak se'e yókxexma nak! ¡Cháxa kélmeneykmássesa axta neyseksa ekneywomáxche', kéltáha kéláneya s'e: ‘Mil énxet apkelnapmak Saúl, keñe David apkelnapma diez mil énxet!’
12 Kelchetagkásawok agko' axta apwáxok David xa amya'a nak, apchekak axta m'a Aquís, wesse' apwányam nak Gat. 13 Tén axta aptáha hó magya'áseyak aqsok nápaqta'awo', máxa segyeyháxma axta aptáhak, apnaqtáxésaha axta aqsa atña'ák nak, apcha'awok axta aqsa élsekkenánto apyamánog ma'a áwa' apátog nak. 14 Keñe axta Aquís aptáha apkeláneya m'a apkeláneykha:
—¿Yagkólyekpelchak kéxegke ekyeyháxma s'e énxet nak? ¿Yaqsa ektáha sélyentegkásento nak? 15 ¿Émenyéya ko'o énxet élyeyháxma sélyentegkásento nak se'e, yaqwayam enxoho eyeykesakpohok exma s'e exagkok nak?
© © Enxet Lengua Sur Bible © Paraguayan Bible Society, 2015.