Jonatán tén han David apteméssesso naqso' yaqwayam elásekhakpoho'
1 Xama axta appenchesa appaqhetchesso David ma'a Saúl, aptemék axta apxegexma apagko' Jonatán ma'a David, awanhek axta apchásekhayo ekhawo ektémakxa nak apchásekhamakpekxoho apagko'. 2 Cháxa ekhem nak, apmakxa axta aptáha apchásenneykha m'a Saúl, keñe megyahayo chá'a ewakxohok ma'a apyáp apxagkok. 3 Apheyásawók axta han mók apkelpaqhetchásamap Jonatán tén han David, aptáha apxegexma meyke néxa, hakte apchásekhayók apagko' axta Jonatán ma'a David, ekhawo ektémakxa nak apchásekhamakpekxoho apagko'. 4 Aplekkek axta han apchaqlamap ma'a Jonatán tén han aptaxno apwenaqte aptaxneykekxa axta, apméssek axta David, yetlo sókwenaqte apagkok, yágke, tén han aptétamap.
5 Tásek axta chá'a katnehek ekteyapma ekyókxoho aqsok apkelanakxa enxoho m'a David, apkeltamhókxa enxoho chá'a elának ma'a Saúl, axta keñamak apteméssessama apkemha apmonye' apagkok ma'a kempakhakma yapmeyk. Leklamók axta han apkelwáxok apyókxoho sẽlpextétamo, keñe han ma'a sẽlpextétamo apkelwesse'e apagkok axta m'a Saúl.
Saúl apnathe David
6 Xama axta apkeltaqháwo sẽlpextétamo natámen axta apchaqhe David ma'a filisteo, kelántekkek axta kelán'ák ekyókxoho m'a tegma apkelyawe nak Israel ekma takha' m'a wesse' apwányam Saúl, kelmeneykmássek axta, neywegkek axta han ekmátsa agko' yetlo élpáwasso kélaqtáwasso, tén han ma'a ekhól'a sokpayhe étkók. 7 Axta táhak chá'a élmeneykmasa kelán'ák neyseksa ekneyweyak se'e:
“Mil énxet apkelnápak Saúl,
keñe David apkelnapa diez mil.”
8 Cháxa eklókasa axta apwáxok ma'a Saúl, aplókók apagko' axta aptáha appaqmeta s'e:
—Apxénákpek David apkelnapa diez mil énxet, keñe ko'o sekxénáxko sélnapa wánxa mil énxet. ¡Kaxwók sa' kólteméssesek wesse' apwányam!
9 Cháxa ekmassakxa axta han ektaqmeleykha apwáxok apkelano Saúl ma'a David.
10 Keñe axta mók ekhem ektaxna apwáxok espíritu ekmaso m'a Saúl, apchehe axta m'a Dios, máxa ekyeyháxma axta aptáhak ma'a kañe' apxagkok apyawe nak. Appáwássek axta aqsa arpa m'a David, aptémakxa axta chá'a, keñe axta Saúl, apmáha axta aqsa sawhéwa apagkok. 11 Pelakkassek axta han apyenyawa sawhéwa apagkok Saúl peya elyetxák David épetchesek nápakha tegma, ánet apkellexpakhasso axta eyke aptáhak David ma'a Saúl sawhéwa apagkok.
12 Apcháyak axta chá'a Saúl ma'a David, hakte Wesse' egegkok axta chá'a appasmók ma'a David, massegkek axta appasmo m'a Saúl. 13 Axta keñamak aptekkessama m'a aphakxa nak, apteméssessama apkemha apmonye' sẽlpextétamo apxámokma, exog axta chá'a apmonye' ey'ammok kempakhakma, tén axta enaqlanták han chá'a. 14 Tásek axta chá'a katnehek ekteyapma ekyókxoho aqsok apkelanakxa enxoho chá'a m'a David, hakte Wesse' egegkok axta chá'a appasmók. 15 Axta keñamak apcháya Saúl apweteya chá'a ektaqmalma ekteyapma m'a aqsok apkelane. 16 Apmenyeyk axta han apyókxoho énxet'ák Israel ma'a David, tén han ma'a Judá, hakte axta apnaqlo chá'a ey'ammok kempakhakma, keñe enaqlanták han chá'a.
17 Keñe axta Saúl aptáha apcháneya m'a David:
—Agkések sa' ko'o exchep ma'a Merab, hatte katnaha étkok yaqwayam etnehek aptáwa', aptáha enxoho kempakhakma yáp ahagkok megyeye emhagkok eyesagkexa', apkempakhássesa enxoho m'a Wesse' egegkok.
Xeyenmeyk axta apwáxok Saúl megyaqhehek apagko' ma'a, hakte filisteos axta xeyenmak apwáxok yaqhek. 18 Aptáhak axta apchátegmowágko David:
—Mékoho ahagko' eyke ko'o, mékoho han énámakkok ma'a kañe' Israel, mowanchek ko'o atnehek apepháyem wesse' apwányam.
19 Wokmek axta ekhem apkeltennassamakxa egkések apketche kelwána Saúl ma'a David, cham'a Merab, axta eyke egkeyásak, Adriel axta aqsa apmeyásak, apkeñama axta m'a Meholá. 20 Keñe m'a Mical, mók apketche axta m'a Saúl, keláneyak axta awáxok élányo David. Xama axta kéltennassama m'a Saúl, leyawók axta han apwáxok, 21 xeyenmeyk axta apwáxok egkések David yaqwayam etnehek aptáwa', yaqwayam kasexnenak yaqhek ma'a filisteos. Tén axta aptáha makham apcháneya David se'e:
—Sa' eyke aptáha épháyem xa.
22 Tén axta Saúl aptáha apkeláneya apkeláneykha s'e:
—Kólpaqhetches sa' apxakko' David, kóltennaksek sa' seyámenyého agko' ko'o, sektáha nak wesse' apwányam, tén han apchásekhayo m'a apyókxoho sélásenneykha nak, kóltennaksek sa' yaqwayam etnehek épháyem.
23 Apkelxegkek axta Saúl apkeláneykha apkeltennássekmo ekyókxoho David xa amya'a nak, keñe axta aptáha apchátegmowágko David se'e:
—¿Kélanagkamcheya kéxegke kexyókok nenteme wesse' apwányam apepháyem, meyke aqsok egagkok, tén han mékoho ektéma nak ko'o?
24 Apkeltaqháwok axta makham Saúl apkeláneykha apkeltennássekxo aptáhakxa appeywa m'a David. 25 Keñe axta Saúl aptáha apchátegmowágko:
—Kóltennés sa' David, maltamhók ko'o hegkések ekyánmaga kélyánmagkassamól'a chá'a ekyánmaga élyamhopma kelán'a, wánxa aqsa émenyeyk hélmések ma'a cien apkelyaqténchesso nekha apyempe'ék ma'a filisteos, yaqwayam enxoho ayaqmagkásekxak setnéssessamakxa m'a katnaha énámakkok.
26 Apkeltennássekxeyk axta han Saúl apkeláneykha David xa amya'a nak, apkelyahákxók axta han David apkeltamho etnehek apepháyem ma'a wesse' apwányam. Keñe axta amonye' yaqwayam kammok ekhem kéltennassamakxa, 27 apnaqlókek axta David sẽlpextétamo apagkok, apkelnapchek axta han doscientos filisteos; tén axta apkelsákxésa wesse' apwányam ma'a apkelyenyekhassáseyak axta nekha apyempe'ék, apkelméssek axta yaqwayam etnehek apepháyem. Yetlókok axta han apmésso Saúl ma'a apketche Mical, yaqwayam etnehek aptáwa'.
28 Xama axta apwet'a Saúl appasmoma Wesse' egegkok ma'a David, keñe han eyásekhayo m'a apketche Mical, 29 Yágweykmók axta apkeye, apkenmexma apagko' axta aptemék neyseksa apha. 30 Apkelántekkek axta agkok chá'a ey'ammok kempakhakma m'a apkelámha apmonye'e nak sẽlpextétamo filisteos, David axta aqsa chá'a emallánek, eyeykhássamhok axta chá'a m'a apyókxoho sẽlpextétamo apkelwesse'e apagkok nak Saúl. Axta keñamak kéláyo kélagko' chá'a.
© © Enxet Lengua Sur Bible © Paraguayan Bible Society, 2015.