Pók tegma apkelane makham Salomón
1 Apkeláneyak axta Salomón tegma apyawe apagkok apagko', trece apyeyam axta weykmok appenchessama apkelane apyókxoho. 2 Apkeláneyak axta han tegma apyawe apteméssessama axta apwesey “Naxma Líbano”, cuarenta y cinco metros axta apwenaqte, veintidós y medio axta m'a appayhakxa', keñe trece metros y medio m'a apmahéyak néten, cuatro yámet cedro élámha éleweykekxa axta han ekméyak ma'a, kélnegkenma axta néten éltegyésso yámet cedro. 3 Cuarenta y cinco axta ekyókxoho xa éltegyésso nak, ántánxo kélexpánchesso axta han kéltemék chá'a kélnegkenéyak ma'a quince éléweykekxa nak, kélchexneykegkek axta chá'a m'a néten élámha nak. Yántéseksek cedro kéleykmassáseykha axta han chá'a heykegkok néten ma'a éltegyésso nak. 4 Ántánxo éleweykekxa axta han átog étkók, kélpékessamo chá'a kélnegkenéyak ántánxo ekpayhémo chá'a mók. 5 Cuatro nekhaw'ék axta han ma'a ekyókxoho átog tén han átog étkók nak, ekpayhémo axta han chá'a mók ántánxo éleweykekxa'. 6 Apkelanak axta han kañe' tegma apteméssessama axta ekwesey ekheykegkaxa Yámet Élámha, veintidós metros y medio axta apwenaqte, keñe trece metros y medio m'a appayhakxa'. Apkelanak axta han pók tegma apwáxok amonye' m'a, yetlo élámha tén han néten. 7 Apkelanak axta han kañe' tegma Sẽlyekpelchémókxa, essenhan kélláneykxéssamakxa chá'a amya'a énxet'ák, yaqwayam enxoho kalanaxchek chá'a kélyekpelchémo énxet'ák ma'a, apsawheyásekxók axta han aphaxtegkesso yántéseksek cedro m'a néten tén han kóneg.
8 Yetneyk axta han yókxexma kélhaxtegkesso m'a neptámen nak tegma apyawe aphamakxa nak Salomón, tén han xama tegma apwáxok aphémo m'a apkelánamap axta. Aphawók axta han apwáxok tegma apyawe apkelánesso axta m'a faraón apketche, apmoma axta aptéma aptáwa'. 9 Meteymog élmomnáwa agko' axta han apyókxoho apkelánamap nak ma'a tegma, cham'a apowhók nak, tén han ma'a apmonye' nak, tén han ma'a nápakhaw'ék nak, tén han ma'a apwáxok ekyawakxa nak, meteymog kélpáxqatma axta tén han kélyaqtenneykekxa ekwánxa enxoho chá'a ekwenaqte, cham'a yókxexma nak tén han kañe'. 10 Meteymog élmomnáwa axta han ma'a apowhók nak, tén han élyawe, cuatro metros y medio axta han chá'a xama, keñe axta han chá'a mók tres metros sesenta centímetros. 11 Meteymog élmomnáwa axta han ma'a ekhéyak nak néten, tén han kélpáxqatma ekwánxa enxoho chá'a ekwenaqte, tén han yántéseksek cedro. 12 Ántánxo éleweykekxa meteymog axta han ma'a neyáwa nak kélhaxtegkesso ekyawakxa nak, tén axta han xama éléweykekxa éltegyésso yámet cedro, hawók axta m'a ektémakxa nak kañe' tegma apwáxok ekyetno nak tegma, tén han ma'a nentaxnamakxa nak Wesse' egegkok tegma appagkanamap apagkok.
Salomón apkeltémo epasmok Hiram
(2 Cr 2.13-142 3.15-17)13 Apkeltamhók axta kólyentawakxak wesse' apwányam Salomón yókxexma Tiro m'a Hiram, 14 apteme axta kelán'a tampe' étche, eñama axta nepyeseksa m'a Neftalí énxet'ák apagkok, apkeñamakxa apagko' axta han ma'a Tiro, apmopwána aptamheykha ektémakxa nenlane sawo ekyexwase. Apwanchek axta elának aqsok ma'a Hiram, apya'áseykegkoho axta han eghak, apya'ásegkok axta ektémakxa nenlane m'a mók ektémakxa nak chá'a nenlane m'a sawo ekyexwase, apwákxeyk axta aphakxa wesse' apwányam Salomón, apkelanak axta ekyókxoho aptamheykha. 15 Apkelpeykesákxeyk axta ánet élámha sawo ekyexwase, ekwayam axta chá'a ocho metros ekmahéyak néten, keñe cinco metros y medio m'a ekyaqye. 16 Apkelanak axta han ánet apqatkok sawo ekyexwase, yaqwayam enxoho elatchesagkok ma'a néten apqatkok nak élámha. Dos metros veinticinco centímetros axta han chá'a ekwenaqte xama m'a apqatkok nak. 17 Apkelanak axta han ánet sawo élyagqáxeykha, élpextétamaxche axta ektémól'a cadenas, yaqwayam enxoho kólnegkenagkok ma'a apqatkok nak chá'a néten ma'a yámet nak élámha: xama sawo élyagqáxeykha chá'a m'a xama nekha apqátek. 18 Apkelanak axta han chá'a ánet éléweykekxa yánta ekyexna kéleykmássesso nekhaw'ék ma'a xama sawo élyagqáxeykha, yaqwayam enxoho elyepetchesek chá'a m'a apqatkok nak élámha. Hawók axta han apteméssesakxa m'a mók nak apqatkok. 19 Xegkessek axta han chá'a dos metros apqatkok ekhéyak néten ma'a élámha nak nentaxnamakxa, pánaqte exnók kéleykmássesso axta han ma'a. 20 Élyaqye axta han chá'a nekhaw'ék tén han néten ma'a apqatkok, cham'a élyawakxa nak chá'a élpayhe, yetlo m'a sawo élyagqáxeykha, doscientos yánta ekyexna kéleykmássesso ánet éléweykekxa axta han ma'a. 21 Apkelánchessek axta han Hiram nentaxnamakxa nak tegma appagkanamap xa élámha nak. Xama axta apkelánchesa chá'a m'a yaqwánxa etnegkesek, Jaquín axta han aptemessásak ekwesey m'a émha nak ekpayho nélya'assamakxa, keñe axta Bóaz ma'a émha nak nepsagqalwa. 22 Pánaqte exnók kéleykmássesso axta han ma'a naw'ék nak élámha. Cháxa ekpenchesáxchexa axta nentamheykha élánamáxche m'a élámha.
Yegmen kélyeta ekyawe
(2 Cr 4.1—5.1)23 Apkelanak axta han Hiram xama kélyátamakxa yegmen ekyawe sawo ekyexwase, yaqwayam kólyetmok yegmen. Ekyaqye axta han ma'a, cuatro metros y medio axta átog. Dos metros veinticinco centímetros axta ekmahéyak néten, trece metros y medio axta ekyaqye. 24 Aqsok ekyexna élápxegamaxche axta han apkelanék ma'a kóneg átog nak nekhaw'ék ma'a kélyátamakxa yegmen, diez axta han chá'a éléweykekxa aqsok ekyexna ekyókxoho m'a, cuarenta y cinco centímetros nak chá'a xama nekha', yepetcheykekxeyk axta m'a aqsok kélyátamakxa yegmen nak. 25 Kélpekkenmeyk axta han néten ma'a doce weyke kelennay'awók kéleykmássesso nak sawo ekyexwase, ántánxo axta kelpayhémok ma'a nexcheyha, ántánxo axta han nepyeyam, ántánxo axta han ma'a ekpayho nak ekteyapmakxa ekhem, keñe han ántánxo m'a ekpayho nak taxnegwánxa ekhem. Kañe' axta kelpeheweykekxak ma'a ataqla amagkok nak, kéltahanchessegkek axta m'a kélyátamakxa nak yegmen. 26 Ocho centímetros axta ekyentaxno émpehek xa kélyátamakxa nak yegmen; kéleykmássessamók axta han pánaqte exnamok axagkok ma'a nekhaw'ék nak, cuarenta y cuatro mil litros axta awanchek kalának yegmen.
27 Apkelánéssek axta han diez ekyennaqtéssamakxa nak kóneg sawo ekyexwase, un metro ochenta centímetros axta chá'a ekwenaqte xama, tén han ma'a ekpayhakxa nak, keñe axta han un metro treinta y cinco centímetros ekmahéyak néten. 28 Axta temék élánamáxche awhók nak se'e: yetneyk axta élmeykegkaxa élyaqhapma kélyaqhakkasso m'a nekhaw'ék nak, 29 keñe axta m'a neyseksa nak élmeykegkaxa kéleykmassáseykencha'a chá'a méwa, weyke kelennay'a, tén han apho énxet ekha apxempenák. Tén axta kélnáxegkáseykencha'a pánaqte exnók néten tén han kóneg ma'a weyke kelennay'a tén han méwa. 30 Cuatro amagkok sawo ekyexwase axta han chá'a xama m'a awhak nak, sawo ekyexwase axta han ma'a élántaxnamakxa nak amagkok. Keñe axta m'a cuatro máséyak nak chá'a awhók, cham'a kóneg nak kélyátamakxa yegmen, ekheykegko élteyeykemxa xapop sawo ekyexwase, ekheykegko axta chá'a pánaqte exnók kéleykmássesso xama nekha'. 31 Kañe' kélhaxtegkesso axta han yetnók átog ma'a kélyátamakxa yegmen, ekyephagweykmoho axta ekmahéyak néten cuarenta y cinco centímetros. Ekyaqye axta átog ma'a, sesenta y ocho centímetros axta han ekmahéyak néten ma'a ekmeykegkaxa nak. Kéleykmassáseykha axta han ma'a néten átog nak, háwe axta han ekyaqye m'a kélapma nak, ekhémo mók nekhaw'ék axta aqsa. 32 Heykegkek axta cuatro amagkok ma'a kóneg nak élmeykegkaxa', keñe axta amagkok élántaxnamakxa élmeykegko m'a awhak nak. Sesenta y ocho centímetros axta han chá'a ekmahéyak néten ma'a xama amnek, 33 hawók axta han ma'a ektémól'a yátnáxeg apyenyawasso amagkok. Sawo élyexwase axta han ma'a ekyókxoho nak élántaxnamakxa amagkok, tén han ma'a élyaqye nak, tén han ma'a ekhéyak nak kañe' awhak eywok. 34 Xama ekpasmeykekxa axta temék ma'a cuatro éltaháno ekhéyak axta chá'a m'a cuatro máséyak nak. 35 Veintidós centímetros y medio axta han ekmahéyak néten néxa m'a nekhaw'ék átog nak; xama ekpasmeykekxa axta han tamheykekxak ma'a élmeykegkaxa nak, tén han ma'a élyennaqtéssamakxa ekyetno nak ma'a néten. 36 Apkeleykmassáseykha axta han Hiram apho énxet ekha apxempenák, méwa tén han áxa m'a nekhaw'ék nak élmeykegkaxa tén han élyennaqtéssamakxa, cham'a ekhakxa axta chá'a malámog yaqwayam kóleykmássesha, tén han pánaqte exnók ma'a nekhaw'ék nak. 37 Cháxa aptémakxa axta apkeláneya m'a diez awhak élyennaqtéssamakxa nak, ekhémo mók appeykáseykekxa sawo, tén han ekhémo mók chá'a ektémakxa tén han ekwenaqte.
38 Apkelanak axta han diez kélyátamakxa yegmen sawo ekyexwase. Un metro ochenta centímetros axta han chá'a xama, ekhémo nak chá'a kólyetmok ochocientos ochenta litros yegmen, kélnegkenágkek axta han ma'a néten nak diez awhók élyennaqtéssamakxa, 39 cinco awhók élyennaqtéssamakxa axta han ma'a ekpayho nak nélya'assamakxa tegma appagkanamap, keñe axta han cinco m'a ekpayho nak nepsagqalwa. Keñe axta kélyátamakxa yegmen ekyawe kélpekkenma m'a ekpayho nak nélya'assamakxa m'a tegma appagkanamap, nekha nak teyapmakxa ekhem ekpayho nak nepyeyam.
40 Apkelánegkek axta han weygke m'a Hiram, pála tén han egheykok élyawe, cháxa appenchesa axta ekyókxoho aptamheykha apkelánesso aqsok Salomón, cham'a Wesse' egegkok tegma appagkanamap apagkok, 41 apkelánéssama axta ánet élámha, tén han ánet apqatkok élyaqye ekhéyak ma'a néten, tén han ánet sawo élyagqáxeykha yaqwayam kólyepetchesek ma'a apqatkok nak, 42 apkeláneyak axta cuatrocientos yántakyexna yaqwayam kaxnagkok nekhaw'ék ma'a ánet sawo élyagqáxeykha nak, ánet éléweykekxa chá'a xama nekha m'a sawo élyagqáxeykha, kélwakhasso nak apqatkok élyaqye ekhéyak axta m'a néten nak élámha; 43 tén han diez awhók élyennaqtéssamakxa, keñe han diez kélyátamakxa yegmen yaqwayam enxoho kólnegkenek chá'a m'a néten nak, 44 tén han kélyátamakxa yegmen ekyawe yaqwayam kólyetmok chá'a yegmen, yetlo doce weyke kelennay'awók kéleykmássesso ekhéyak ma'a kóneg, 45 tén han táhap kélxata, pála tén han sokpayhe élyawe.
Sawo ekyexwase kélyenmáseykekxa axta han ekyókxoho m'a aqsok kélmeykegkaxa', apkelánesso axta Hiram ma'a wesse' apwányam Salomón, yaqwayam kólmaha m'a Wesse' egegkok tegma appagkanamap apagkok. 46 Axta apkelánegweykmok wesse' apwányam apkelpeykeseykekxo m'a yagkamex nak yókxexma Jordán, cham'a teyp nak Sucot halep nak Saretán. 47 Xámok agko' axta han ma'a aqsok kélmeykegkaxa nak élánamáxche sawo ekyexwase, axta kaxeyenmak apwáxok elyetsetagkok ekwánxa m'a Salomón.
48 Apkeltamhók axta han kóllanaksek Salomón ma'a ekyókxoho aqsok kélmeykegkaxa', ekhéyak axta m'a Wesse' egegkok tegma appagkanamap apagkok: cham'a ekwatnamáxchexa nak aqsok élánamáxche sawo ekyátekto ekmomnáwa, tén han mésa sawo ekyátekto ekmomnáwa kélnegkenmakxa axta chá'a néten ma'a pán kélpagkanchesso nak Wesse' egegkok, 49 tén han cháléwasso élyawe sawo ekyátekto ekmomnáwa ekhéyak axta chá'a m'a ekpayho nak Ekpagkanamaxchexa agko', cinco axta m'a ekpayho nak nélya'assamakxa, tén han cinco m'a ekpayho nak nepsagqalwa, yetlo pánaqte exnók kéleykmassáseykha, tén han cháléwasso étkók agkok, tén han kélmeykha nak chá'a kólsapanchesek, élánamáxche nak sawo ekyátekto ekmomnáwa, 50 tén han ma'a egheykok, tén han ma'a kélmeykha nak chá'a kólsapanchesek cháléwasso, tén han egheykok élyawe, tén han yekweykto élyawe, tén han ma'a aqsok ánek ekmátsa nak ekpaqneyam axagkok, sawo ekyátekto ekmomnáwa ektaqmalma agko' axta han ekyókxoho xa. Sawo ekyátekto ekmomnáwa axta han ma'a sawo élmayheykekxexa nak chá'a atña'ák ma'a Ekpagkanamaxchexa agko' nak, cham'a kañe' nak tegma appagkanamap, tén han ma'a atña'ák nak ma'a tegma appagkanamap.
51 Xama axta ekpenchásexko ekyókxoho nentamheykha apkeltémo axta kalanaxchek wesse' apwányam Salomón ma'a Wesse' egegkok tegma appagkanamap apagkok, apkelsókek axta Salomón ma'a aqsok kélmeykegkaxa nak sawo ekyátekto élmomnáwa, tén han sawo ekmope élmomnáwa, apkelpagkanchesso axta Wesse' egegkok ma'a David, apyáp axta, apxátawokmek axta m'a kélxátamakxa axta chá'a aqsok élmomnáwa m'a Wesse' egegkok tegma appagkanamap apagkok.
© © Enxet Lengua Sur Bible © Paraguayan Bible Society, 2015.