Salomón ekhémo mók apkelpaqhetchásamákpoho wesse' apwányam Tiro
(2 Cr 2.1-18)1 Xama axta apleg'a amya'a Hiram, wesse' apwányam nak Tiro, kélteméssesa wesse' apwányam Salomón, apyaqmagkasso m'a David, apyáp axta, apkeláphássek axta apkeláneykha, hakte apchásekhayók axta chá'a Hiram ma'a David. 2 Keñe axta Salomón apkeltamho kóltéhek kóltennaksek Hiram se'e: 3 “Apya'ásegkok xeyep ma'a David, táta axta ko'o, mopwanchek axta apmáheyo elanaksek xama tegma Dios Wesse' apagkok, eñama eyáhapwe kempakhakma, tén han ekwokmoho apmésa yaqwayam elmok Wesse' egegkok ma'a apkelenmexma. 4 Egméssek eyke kaxwók Dios Wesse' ahagkok meyke ektáhakxa apkelwáxok ekyókxoho apheykegkaxa énxet'ák, hakte méko kaxwók sẽlenmexma, tén han aqsok ekmaso. 5 Xénchek ko'o kaxwók ewáxok alanaksek xama tegma m'a Dios Wesse' ahagkok, eñama m'a aptémakxa axta apméssama appeywa m'a David, táta axta, apxeyenma axta apketche etnehek apyaqmagkasso apteme wesse' apwányam, yaqwayam elanaksek xama tegma. 6 Yána sa' hélyaqténchesek ko'o cedro yámet éleñama nak Líbano. Epasmok sa' apkeláneykha m'a séláneykha nak, ko'o sa' han ayánmagkasek sélmaxneya enxoho ekwánxa apkeltamho ayánmagkasek ma'a apkeltamheykha, hakte méko negko'o enxama enxoho apmopwána eyaqtennek yámet, ektéma nak ma'a sidonios.”
7 Xama axta apleg'a Hiram ektáhakxa appeywa apcháphasso m'a Salomón, payhékxók agko' axta apwáxok, keñe aptáha s'e: “¡Tásek sa' chá'a katnehek apxénamap Wesse' egegkok se'e ekhem nak, hakte apméssegkek David xama apketche apya'áseykegkoho aqsok, yaqwayam elanha s'e énxet'ák apxámokma apagko' nak!”
8 Keñe axta Hiram apkeltamho kóltéhek kóltennássekxak ma'a Salomón: “Ekxawágwakteyk ko'o appeywa seyaphássesso exchep, alának sa' ma'a apkeltamho nak ayaqténchesek yámet cedro, tén han ma'a yámet pino. 9 Séláneykha sa' elántekkesek éleñama m'a Líbano, ekweykekxoho m'a wátsam ekwányam, sa' wának kalpátawók yántakpayhe m'a séltennasakxa enxoho ekpayhókxa. Sa' kólyenyekxak yántakpayhe m'a, keñe sa' xép yánchásekxak ma'a yámet. Keñe sa' xép elának ma'a sekmámenyého nak ko'o, hélmések nento yaqwayam elsakxak ma'a exagkok apyawe nak.”
10 Keñe axta Hiram apkelmésa Salomón ma'a ekyókxoho yámet cedro, tén han yámet pino, apmopmenyého axta, 11 tén axta Salomón apkelmésa Hiram nento yaqwayam elsakxak ma'a apxagkok apyawe nak: cuatro millones cuatrocientos mil kilos axta m'a hótáhap, tén axta cuatro mil cuatrocientos litros ma'a pexmok égmenek élánamáxche nak oliva. Cháxa apkelméssama axta chá'a Salomón yókxoho apyeyam ma'a Hiram. 12 Cháxa aptémakxa axta Wesse' egegkok apméssama apya'áseykegkoho aqsok ma'a Salomón, ekhawo apkeltennassama axta etnéssesek. Aphéssamók axta han mók apkelpaqhetchásamákpoho Hiram ma'a Salomón, méko axta ektémakxa apkelwáxok neyseksa apheykha.
13 Keñe axta wesse' apwányam Salomón apméssama ekyentaxno apkeltamheykha m'a Israel, treinta mil énxet axta han apchánchesákxa', 14 kéláphassegkek axta Líbano, apyaqmagkasso chá'a pók xama pelten, diez mil énxet chá'a. Xama pelten axta apheykha Líbano xa énxet'ák nak, keñe axta apqánet pelten ma'a apxanák. Adoniram axta han apxegkessesso m'a apkeltamheykha. 15 Yetneyk axta han Salomón setenta mil chá'a apkelpata yámet, keñe ochenta mil apkelpáxqatma meteymog ma'a egkexe nak, 16 meyke kélyetsáteykekxa m'a tres mil trescientos apkelámha apmonye'e, apkeltamheykha axta chá'a yaqwayam exegkessesek apkeltamheykha m'a apkeltamheykha nak chá'a. 17 Apkeltémók axta kólhaxyawaksek wesse' apwányam meteymog élyawe éltaqmalma nak, yaqwayam kólnegkenek apowhók ma'a tegma, keñe han ma'a meteymog kélyaqtenneykekxa nak. 18 Apkelyaqtenneykegkek axta yámet ma'a Salomón apkeláneykha tén han Hiram, tén han ma'a apheykha nak nepyáwa', cham'a Guebal, apkelpaxqáteykekxeyk axta meteymog yaqwayam elanakpok ma'a tegma.
© © Enxet Lengua Sur Bible © Paraguayan Bible Society, 2015.