Negmallanma ektémakxa nak keso náxop
1 Negyókxoho nenteme nak magya'ásseyam Jesús apteme Mesías, nentemék negko'o Dios apketchek; enxama apchásekhayo enxoho xama énxet ekha nak apketchek, elásekhásseshok nahan ma'a apketchek. 2 Negásekha'awók agkok negko'o m'a Dios tén han nenlana enxoho m'a apkeltémókxa nak antéhek, agya'asagkohok nahan nélásekhayo m'a Dios apketchek nak. 3 Cha'a negásekhayo Dios ma'a nélyaheykekxoho nak apkeltémókxa antéhek; kexyókok nahan ma'a apkeltémókxa nak antéhek, 4 hakte negyókxoho nenteme nak Dios apketchek, agmallánek ma'a ektémakxa nak keso náxop. Magya'ásseyam nahan keñamak segmallahanchesso negko'o m'a ektémakxa nak keso náxop. 5 Negko'o ektáhakxa enxoho magya'ásseyam Jesús apteme Dios Apketche, agmallánek ektémakxa nak keso náxop.
Dios Apketche apxénamap
6 Apwayak axta Jesucristo yetlo yegmen, magkenatchesso kélyaqpássessama yegmen, tén han yetlo éma magkenatchesso m'a apketsapma axta; háwe axta eyke ekwánxa agkok yegmen, yegmen yetlo éma axta eyke anhan. Espíritu apagko' axta nahan apxeyenma ektáha naqsók xa, apmámnaqsoho nahan ma'a Espíritu. 7 Ántánxo ektáha nak ekxeyenma ektáha naqsók xa: 8 cham'a Espíritu, yegmen, tén han ma'a éma; hawók nahan mók ekxeyenma xa ántánxo nak. 9 Magya'ássemek chá'a negko'o apkelxeyenma aqsok ma'a énxet, akke ekyágwánxa agkok magya'ássemek agko' ma'a ektémakxa nak apxeyenma Dios, hakte Apketche axta apxeyenmak. 10 Negko'o ektáhakxa enxoho magya'ásseyam Dios Apketche, keytek egwáxok xa ektémakxa nak apxeyenma Dios; keñe m'a ektáhakxa enxoho negya'ásseyam ma'a Dios, máxa apmopwána amya'a anteméssesek, hakte agya'ássók ma'a aptémakxa nak Dios apxeyenma Apketche. 11 Cháxa aqsok sẽltennasso axta, apxeyenmeyk axta Dios segméssama negko'o ekyennaqte egnények megkatnégwayam néxa, cháxa ekyennaqte egnények ekyetnama nak ma'a Apketche. 12 Negko'o ektáhakxa enxoho negyepetcheyo Dios Apketche, keytek negko'óxa xa ekyennaqte egnények nak; keñe m'a mépetcheyo nak Dios Apketche, megkeytek xa ekyennaqte egnények nak.
Ektemegwánxa néxa kélmésso amya'a énxet'ák
13 Kéxegke ektáxéssásak se'e weykcha'áhak nak, kélteme nak megkólya'ásseyam Dios Apketche, yaqwayam enxoho kólya'asagkohok ekyetna kéxegke m'a ekyennaqte egnények megkatnégwayam néxa nak.
14 Magya'ásseykmok negko'o Dios, hakte negya'ásegkók negko'o nélmaxneya enxoho m'a aqsok apmopmenyého nak, megkatnehek megyaháxenmo nélmaxnagko. 15 Negya'ásegkók nahan negko'o ekyetna m'a aqsok nélmaxnagko axta Dios, ekhawo ektémakxa nak han negya'áseyak negko'o apháxenmo chá'a Dios ma'a nempeywa nélmaxnagko egagkok nak.
16 Apwet'ak agkok enxama apkelana mey'assáxma apyáxeg, cham'a magya'assáxma mehegya'assamól'a nétsapmakxa', kéméxcheyk elmaxnéssesek, Dios sa' egkeyásekxak makham apyennaqte xa apyáxeg nak, megkatnaha enxoho m'a mólya'assáxma segya'assamól'a nétsapmakxa'. Yetneyk mólya'assáxma segya'assamól'a nétsapmakxa', akke axénak ko'o eyéméxko kólmaxnéssesek kólxének xa ektéma nak mólya'assáxma. 17 Ekyókxoho ekmaso nentémakxa ekteme mólya'assáxma; yetneyk eyke mólya'assáxma mehegya'assamo nak nétsapmakxa'.
18 Negya'ásegkók eyke negko'o énxet apteme nak Apyáp ma'a Dios, melenxanmagkók apkelane mey'assáxma, hakte Dios Apketche etaqmelchesek, megkatnéssessamók nahan exma ekmaso m'a kelyekhama'. 19 Negya'ásegkók negko'o nenteme Dios énxet'ák apagkok, negya'ásegkók nahan éláneykencha'a kelyekhama' ekyókxoho keso náxop. 20 Negya'ásegkók nahan negko'o m'a apwaya axta Dios Apketche, tén han segméssama negya'ásegwayam yaqwayam enxoho agyekpelkohok ma'a Dios apteme nak apmámnaqsoho. Negyepetcheyók negko'o m'a apteme nak apmámnaqsoho, cham'a Jesucristo apteme nak Dios Apketche. Cháxa apteme nak Dios apmámnaqsoho xa, tén han ekyennaqte egnények megkatnégwayam néxa. 21 Étchek sélásekhayo, kóláwho sa' kéxegke m'a aqsok kéláyókxa megkamámnaqsoho nak.
© © Enxet Lengua Sur Bible © Paraguayan Bible Society, 2015.