Dios apketchek
1 Kóllano hana, awanhek segásekhayo Dios Egyáp, ékeso éñamakxa néltamhomaxko nak negko'o Dios apketchek, naqsók nahan nenteme. Ékeso éñamakxa mehẽlyekpelchama nak han negko'o m'a énxet'ák apkeleñamakxa apagko' keso náxop, hakte melya'ásegkok ma'a Dios Egyáp. 2 Élyáxeg sélásekhayo, nentemegkek negko'o kaxwók Dios apketchek. Eykhe agya'ásegkok makham negko'o háxko sa' nenteme m'a egmonye' sa', negya'ásegkók eyke peya anxohok Jesucristo m'a apwa'akto sa' makham, hakte agwetak sa' aptémakxa. 3 Negyókxoho ekyetnakxa enxoho xa nélhaxanma nak, negáxñásamaxchekxoho egagko' antéhek, ekhawo ektémakxa nak apcháxñeyo m'a Jesucristo.
4 Negyókxoho nenlane nak mólya'assáxma, aqsok ekmaso chá'a anlána', hakte mólya'assáxma ekteme ekmaso nentémakxa. 5 Kélya'ásegkok eyke kéxegke apwaya Jesucristo keso náxop yaqwayam hegyenyókasek mólya'assáxma, tén han meláneya mey'assáxma xama enxoho. 6 Apyókxoho énxet apkelenxáneykmoho nak apyepetcheyo Cristo, melenxanmagkók apkelane mey'assáxma; keñe m'a apkelenxanmeykegkoho nak apkelane mey'assáxma, meteyk ma'a Cristo, mey'ásegkok nahan xama enxoho. 7 Étchek sélásekhayo, nágkólho aqsa kólyexanchesha xama enxoho: énxet ektáhakxa enxoho apkelane ekpéwomo nentémakxa, cháxa apteme énxet ekpéwomo aptémakxa xa, ekhawo ektémakxa nak appéwomo m'a Cristo; 8 keñe m'a énxet apkelane nak mólya'assáxma, cháxa apteme kelyekhama' énxet agkok xa, hakte keláneyak axta mólya'assáxma kelyekhama' eyeynamo m'a sekxók agko' axta. Axta keñamak apwaya Dios Apketche xa, yaqwayam emasséssak ektémakxa axta aqsok élane m'a kelyekhama'.
9 Melanyek chá'a xama enxoho mólya'assáxma m'a énxet apteme nak Dios apketche, hakte keytek apwáxok ma'a axnagkok aqsok apmésso nak Dios; mopwanchek nahan elenxanmagkohok apkelane mey'assáxma, hakte Dios apketche xa. 10 Kólya'asagkohok nahan chá'a m'a apteme nak Dios apketchek, kólya'asagkohok nahan chá'a m'a apteme nak kelyekhama' étchek, hakte apyókxoho ektáhakxa enxoho chá'a melane aqsok ektaqmela essenhan ma'a megyásekhayo nak apyáxeg, háwe Dios énxet apagkok xa.
Nélásekhamaxkoho
11 Keso amya'a kéllegaya axta kéxegke sekxo' agko' axta s'e: ólásekhaxkohok sa'. 12 Mantéhek sa' negko'o aptémakxa axta Caín, apteme axta kelyekhama' énxet agkok, apchaqhegkek axta apyáxeg. ¿Yaqsa axta ektéma apchaqhama apyáxeg Caín? Axta ñémékxa ekmasagko aqsok apkelane, keñe axta apyáxeg apkeláneya aqsok ektaqmela.
13 Élyáxeg sélásekhayo, nágkólchenatches aqsa kéxegke aptaqnawaya enxoho énxet'ák apkeleñamakxa apagko' nak keso náxop. 14 Negyeykhayak axta negko'o nétsapma negmoma ekyennaqte egnények, negya'ásegkók nahan negko'óxa xa, hakte nélásekhayók negko'o ẽlyáxeg'a. Kéxegke ektáhakxa enxoho megkólásekhayo kélmók, máxa kéletsapma makham kóltéhek. 15 Negyókxoho ektáhakxa enxoho nentaqnagko egyáxeg, cháxa nentáha negaqhe egmók xa, kélya'ásegkok nahan kéxegke énxet ekyetno nak apyógkexma megkeytek ma'a ekyennaqte egnények megkatnégwayam néxa nak. 16 Negya'ásegkók eyke kaxwók negko'o ektémakxa m'a ekha nak negásekhayo, hakte apmeyásamákpoho apagko' axta aptemék Jesucristo yaqwayam emátog negko'o apmáheyo hẽlwagkasek teyp; negko'o nahan kéméxcheyk agyenyawaxkohok egagko' yaqwayam agmátog ólwagkasek teyp ma'a ẽlyáxeg'a. 17 Xámók agkok aqsok apagkok enxama, apwet'ak agkok apyáxeg eyéméxko aqsok, keñe megkése', kaqhok exének ekyetna apwáxok apchásekhayo m'a Dios. 18 Étchek sélásekhayo, tásek mantéhek negásekhayo egmók wánxa m'a nempeywa nak, kéméxcheyk anxekmósek nahan ekmámnaqsoho nentamheykha.
Megkatnaheykha egwáxok nápaqtók Dios
19 Sa' kañék negko'o negya'áseykegkoho nentáha néleñama ekmámnaqsoho, méko sa' katnehek ektáhakxa egwáxok nápaqtók Dios; 20 ensexnenakkek agkok negko'o egwáxok eñama xama aqsok, Dios akke apteme apwányam apagko' megkaxnawok ma'a egwáxok, apya'ásegkók nahan ekyókxoho aqsok. 21 Élyáxeg sélásekhayo, agkok hensexneneyk negko'o egwáxok, keytek negko'o megkatnaheykha egwáxok nápaqtók Dios; 22 hegmések sa' nahan ekyókxoho aqsok nélmaxneyakxa enxoho, hakte nélyaheykekxók negko'o m'a apkeltémókxa nak antéhek, nenlánéyak nahan ma'a ekleklamókxa nak apwáxok antéhek. 23 Apkeltémók negko'o antéhek magya'ásseyam Jesucristo apteme nak Dios Apketche, tén han ólásekhaxkoho' ekhawo apkeltémókxa axta antéhek Cristo. 24 Enxama ektáhakxa enxoho apkelyaheykekxoho apkeltémókxa nak antéhek Dios, apyepetcheyo nahan etnehek ma'a Dios, épetkohok nahan Dios ma'a. Keso segya'assáseykegkoho nak negko'o segyepetcheyo m'a Dios: cham'a Espíritu segméssama axta nahan negko'o.
© © Enxet Lengua Sur Bible © Paraguayan Bible Society, 2015.