Nélxegexma'a nentamheykha nenláneya m'a nentamheykha eñama nak Dios
1 Élyáxeg, mowanchek axta ko'o sekmáheyo atnehek sélpaqhetchesso kéxegke m'a ektémól'a ólpaqhetchesek ma'a énxet apha nak apkelwáxok ma'a Espíritu apkeñama Dios, wánxa axta aqsa sektéma sélpaqhetchesso m'a nentémakxal'a ólpaqhetchesek énxet apméssól'a apkelwáxok ektémakxa keso náxop, ektémól'a sakcha'a ekmasextohol'a ekya'áséyak ma'a aqsok éleñama nak Cristo. 2 Ekméssegkek axta kéxegke nélxekmowásamáxche megkamáske, ektémól'a sakcha'a ketse' kólagkok ma'a weyke nagkeygmenek, keñe megkaxkayek ma'a ekto ekyennaqte nak, hakte megkólwanchek axta makham kéxegke kólnaqsapok ma'a kélto ekyennaqte nak. ¡Megkólwanchek eyke makham kólnaqsapok se'e kaxwo' nak!, 3 hakte kélyelqáxkók makham. Yetneyk makham kélnepyeseksa kéxegke m'a kélnatha nak, tén han kélenmexamaxche', hakte kélyelqáxkók makham, kéltemék makham ma'a apkeltémakxa nak ma'a énxet'ák apkelmésso nak apkelwáxok ektémakxa keso náxop. 4 Hakte aptemék agkok chá'a appeywa kélxama s'e: “ko'o sekteme Pablo apkelxekmósso”, keñe pók etnehek chá'a s'e: “ko'o sekteme Apolo apkelxekmósso”, makhemek makham kélteme m'a ektémakxa nak élchetamso apkelwáxok ma'a énxet'ák apkelyetleykekxa nak ektémakxa keso náxop.
5 ¿Yaqsa eyke m'a Apolo?, ¿yaqsa eyke nahan ma'a Pablo? Kélapháseykha eyke aqsa m'a, neykhe keñamak kéltamheykegko nak kéxegke megkólya'ásseyam ma'a. Enxama nahan chá'a negko'o nenlaneyk ma'a nentamheykha segmésso axta Wesse' egegkok yaqwayam anlána': 6 Ko'o chá'a séneykekxa, keñe Apolo apkelexpaqhéyak yegmen, Dios akke apkektegkesso chá'a m'a aqsok negkeneykekxa'. 7 Mékoho eyke m'a ektáha nak apkeneykekxa tén han ma'a apkelexpaqhéyak yegmen, Dios akke apwánxa apagkok chá'a apkelane ekyókxoho, hakte cha'a apkektegkesso chá'a aqsok kélcheneykekxa m'a. 8 Aphawók eyke pók ma'a ektáha nak apkeneykekxa aqsok, tén han ma'a apkelexpaqhéyak nak yegmen. Dios sa' eyke egkések ekyánmaga xama xama m'a ektémakxa nak chá'a apkelane apkeltamheykha. 9 Negko'o nenteme nélpasmomáxkoho nentamheykha nenlánésso aqsok ma'a Dios, kéxegke eyke kélteme kélhémo m'a namyep kélcheneykekxa nak aqsok, kéxegke nahan kélteme tegma apkelánamap ektáha nak apagkok ma'a Dios. 10 Ko'o eyke sekteme sémha emonye' tegma apkelánamap, ektáha axta segkésso Dios apkeltémo alának tegma apowhak ekyennaqtéssamakxa nak eñama ektaqmeleykha apwáxok sélányo, keñe pók énxet apxegkesso m'a néten nak. Enxama eyke chá'a kéméxcheyk antaqmelcheshok nenláneykegkoho ektémakxa nenlane, 11 hakte méko kawának kalánekxak makham pók tegma apowhak nanók kélpekkenma axta, cham'a Jesucristo. 12 Cháxa tegma apowhak apkelánamap nak, enxama chá'a apwanchek exegkesek néten apkelane emha m'a sawo ekyátekto élmomnáwa nak, tén han ma'a sawo ekmope élmomnáwa nak tén han ma'a meteymog éltaqmalma nak, essenhan ma'a yántéseksek, áw'ák tén han ma'a tappo; 13 sa' eyke kataqmelek agko' ekwetamaxche ektémakxa apkeltamheykha m'a ekhem nélyekpelchamáxchexa sa', hakte yetlo táxa sa' katnehek ekwa'a enxoho xa ekhem nak, táxa sa' nahan katnehek ekxekmósso ektémakxa chá'a aptamheykha apkelane m'a xama. 14 Sa' agkok emyetak apkelane xama énxet, exkak sa' ekyánmaga; 15 apmetchek sa' agkok ma'a apkelane nak, kamassegwók sa' ma'a aptamheykha, ewagkasakpok sa' eyke teyp ma'a ektáha axta apkelane, máxa sa' etnehek ma'a apkegketamakpohol'a neyseksa táxa.
16 ¿Yagkólya'áseykegkok kéxegke kélteme Dios tegma appagkanamap apagkok, tén han aphama kélwáxok ma'a Dios Espíritu apagkok? 17 Apmasséssekmek sa' agkok xama énxet Dios tegma appagkanamap apagkok, Dios sa' nahan emasséssók ma'a énxet nak, hakte Dios tegma appagkanamap apagkok apteme appagkanamap, kéxegke kélagko' nahan kélteme xa tegma appagkanamap nak.
18 Nágkólyexanchesaxchekxoho aqsa kélagko': apkeneykek sa' agkok keytnak apya'áseyak kélxama kéxegke ekhawo ektémakxa nak apkelya'áseyak énxet keso náxop, kéméxcheyk etnekxak ma'a aptémól'a xama énxet meyke apya'áseyak aqsok, yaqwayam sa' etnehek ekmámnaqsoho agko' apya'áseykegkoho aqsok. 19 Hakte ekyeyháxma chá'a etnésseshok Dios ma'a negya'ásegwayam eñama nak keso náxop, hakte temék eknaqtáxésamaxche weykcha'áhak se'e: “Emha chá'a Dios ektémakxa nak apkelya'áseykegkoho apancha'awók énxet ekha nak apkelya'áseyak, yaqwayam enxoho elmok”. 20 Temék nahan eknaqtáxésamaxche s'e: “Apya'ásegkók Wesse' egegkok ektémakxa nak élchetamso apkelwáxok énxet ekha nak apkelya'áseykegkoho ekteme ekyeyháxma.” 21 Ékeso éñamakxa méko kawának keyxkohok awáxok eñama élane m'a apkeltémakxa nak énxet; hakte ekyókxoho aqsok ekteme kélagkok kéxegke. 22 Pablo, Apolo, Cefas, tén han keso náxop, tén han negyennaqte, nétsapma, tén han se'e kaxwo' nak, tén han ma'a egmonye' sa'; ekyókxoho ekteme kélagkok kéxegke, 23 kéxegke eyke kélteme Cristo énxet'ák apagkok, keñe Cristo aptáha apagkok ma'a Dios.
© © Enxet Lengua Sur Bible © Paraguayan Bible Society, 2015.