Amya'a ekxeyenma Cristo apketsapma néten aqsok ektegyésso
1 Élyáxeg, axta ko'o ameykha negmowána nak nempeywa, tén han negya'áseykegkoho nak, sekmaheykegko axta kélheykegkaxa séltennáseykencha'a m'a aqsok ekyexamaxche apmáheyo nak elának ma'a Dios. 2 Axta ko'o altémók ay'asagkohok mók aqsok sekhama axta kélnepyeseksa kéxegke, wánxa axta aqsa m'a eñama nak Jesucristo, axta ekyágwánxa agkok séltémo ay'asagkohok ma'a kélyepetchessama axta aqsok ektegyésso m'a Jesucristo. 3 Ekyelqamáxcheyk axta ko'o sénegweykmo kélnápaqta'awók kéxegke, élpexyennamomchek axta nahan eñama seyeye. 4 Xama axta sélpaqhetchessama tén han séltennáseykencha'a tásek amya'a, axta ameykha ko'o m'a negmowána nempeywa nak yaqwayam enxoho alekwomhok kéxegke. Eklekweykmók axta ko'o kéxegke sekxekmóssama m'a Espíritu tén han Dios apmopwána, 5 yaqwayam enxoho katnehek éñamakxa megkólya'ásseyam kéxegke m'a Dios apmopwána nak, keñe megkatnehek éñamakxa m'a ektémakxa nak apkelya'ásegwayam énxet.
Dios segya'assásegwayam aqsok ekyexamaxche apmáheyo elának eñama Espíritu apagkok
6 Agmaha eyke chá'a negko'o negmowána nempeywa nepyeseksa m'a énxet'ák ekyennaqwayam nak aptamhéyak melya'ásseyam. Háwe eyke negya'ásegwayam ekyetnama nak keso náxop, háwe nahan ma'a apkelya'ásegwayam nak apkeláneykha nak apkelókxa, ekmáheyo nak elmassegwók. 7 Akke m'a Dios apya'ásegwayam ekpowásamáxkoho nak, aqsok ekyexamaxche apmáheyo nak elána', apkeláneya axta yaqwayam henteméssesek néleymáxkoho eyeynamo m'a sekxók axta, amonye' axta apkelane keso náxop. 8 Cháxa melya'áseykegko axta apkeláneykha nak apkelókxa keso náxop, kaxtemék axta apkelya'áseyak ma'a, megkólyepetchesek axta aqsok ektegyésso Wesse' egegkok ekha nak apcheymákpoho. 9 Temegkek eyke eknaqtáxésamaxche weykcha'áhak se'e:
“Apkelánéseykekxeyk Dios
apkelásekhayókxa m'a
aqsok
méteya nak xama énxet
tén han ma'a meñeya nak,
tén han ma'a
megkaxeyenma nak
kélwáxok”.
10 Cháxa aqsok segya'assásegweykmo nak Dios eñama apchásenneykekxa m'a Espíritu, hakte Espíritu chá'a apkelányo m'a ekyókxoho nak, ekweykmoho m'a aqsok magya'áseyak éleñama nak Dios.
11 ¿Yaqsa énxet apwanchek ey'asagkohok ekyetno nak kañók agko' apwáxok énxet? Wánxa m'a espíritu aphama nak apwáxok énxet. Ekhawo nak han ma'a Espíritu apkeñama nak Dios wánxa aqsa ey'asagkohok ma'a aqsok ekyetnama nak ma'a Dios. 12 Axta anxaweyk negko'o espíritu apkeñama nak keso náxop, wánxa axta m'a Espíritu apkeñama nak Dios, yaqwayam enxoho agya'asagkohok ma'a aqsok segmésso axta Dios eñama segásekhayo. 13 Anxénhok chá'a negko'o xa aqsok nak yetlo negmeykha m'a amya'a sẽlxekmósso axta m'a Espíritu apkeñama nak Dios, háwe m'a amya'a sẽltámeye nak eñama negya'ásegwayam egagko'. Cháxa nentémakxa nak negko'o néltennáseykencha'a énxet'ák ma'a eñama nak espíritu, negmeykencha'a chá'a m'a amya'a eñama nak ma'a espíritu.
14 Énxet meyke nak apwáxok Espíritu memhehek takha' m'a aqsok éleñama nak ma'a Dios Espíritu apagkok, hakte ekyeyháxma yána'. Mopwanchek nahan ey'asagkoho', wánxa aqsa apwanchek chá'a etnehek apyekpelchémo m'a apha enxoho apwáxok ma'a Espíritu. 15 Keñe m'a énxet apha nak apwáxok Espíritu, apwanchek etnehek apyekpelchémo ekyókxoho aqsok, méko nahan kawának keykpelkohok ma'a énxet nak. 16 Hakte temék eknaqtáxésamaxche s'e: “¿Yaqsa ekya'áseykegkoho ektémakxa élchetamso apwáxok Wesse' egegkok? ¿Yaqsa awanchek kalxekmósagkok?” Hawók negko'o élchetamso egwáxok ektémakxa nak élchetamso apwáxok ma'a Cristo.
© © Enxet Lengua Sur Bible © Paraguayan Bible Society, 2015.