Aqsok kélánchessáseykekxa ẽlyáxeg'a
1 Kélánchessásekxeyk agkok chá'a aqsok ma'a énxet'ák apkelpagkanamap nak, kólteme chá'a m'a sektémakxa axta ko'o sélanagkama séltémókxa chá'a etnahagkok ma'a énxet'ák apchaqneykekxexa nak Galacia. 2 Kélxama nahan chá'a kéméxcheyk kéxegke kólyetnakhaksek nekha selyaqye kélagkok yókxoho domingo, cham'a ekwánxa enxoho chá'a kélwete selyaqye, kóltaqmelchesek nahan yaqwayam enxoho megkólanchásekxeyk ma'a sekwa'akto sa' ko'o. 3 Ekwa'akteyk sa' agkok ko'o xa, aláphaksek sa' ko'o Jerusalén ma'a énxet'ák ektáha enxoho kélyéseykha kéxegke, yetlo apseykha weykcha'áhak yaqwayam esókasek ẽlyáxeg'a aqsok kéláncheseykekxa nak kéxegke. 4 Payhawók agkok axog ko'o xa, hélyetlók sa' nahan ma'a énxet'ák nak.
Pablo apkeláneykekxa aptáhakxa yaqwayam exog
5 Ekxegkek sa' agkok ko'o, sa' apéwhok ma'a Macedonia, ekyeyk'ak sa' agkok ma'a Macedonia, keñe sa' awakxak ma'a Corinto. 6 Yáma ekwenaqte sa' kexaha axek kélnepyeseksa kéxegke, essenhan kawomhok ma'a néxa apmopsamágexal'a; keñe sa' kéxegke hélpasmok neyseksa sekxega, cham'a sekmakókxa enxoho amhagkok natámen. 7 Makke ko'o altamhók alwetekxak kéxegke yaqwatakxoho peya nak ayeykhágwók, émenyeyk ko'o yáma kawegqohok sekha kélnepyeseksa kéxegke, cham'a apkeltamho enxoho Wesse' egegkok; 8 axek sa' eyke ko'o Éfeso ekweykmoho m'a ekhem mólwagqayam Pentecostés la'a, 9 hakte élmeykessessek ko'o yaqwayam alának sektamheykha, apxámók eykhe m'a énxet'ák sénmexeykha nak chá'a ko'o.
10 Apwa'ak sa' agkok Timoteo, kólmés sa' meyke ektáhakxa apha kélnepyeseksa kéxegke, hakte apkeláneyak chá'a m'a aptamheykha eñama nak Wesse' egegkok ekhawo nak ko'o. 11 Nágkólwanyoho aqsa kélxama kéxegke; kólpásem sa' aqsa yaqwayam enxoho elenxanmohok apxega yetlo meyke ektáhakxa, yaqwayam sa' hetyánegwatámhok ko'o, hakte élhaxneyk ko'o ewaták se'e, yetlo sélxegexma'a m'a nápakha ẽlyáxeg'a nak.
12 Keñe m'a egyáxeg Apolo, hágkaxwe eykhe ko'o altamhok etnehek meyk'a kéxegke yetlo apkelxegexma'a m'a ẽlyáxeg'a, akke emáheyók makham exog se'e kaxwo' nak. Exog sa' eyke m'a ektepa sa' yaqwayam exog.
Pablo ekxeyenma apwáxok
13 Kólleyxmakha chá'a, kólyennaqtés kélteme megkólya'ásseyam; nágkóle', kólwasqápekxoho. 14 Ekyókxoho aqsok kéllanakxa enxoho chá'a, kóllána chá'a yetlo kélásekhamaxkoho.
15 Élyáxeg, kélya'ásegkók kéxegke ekheykha nak Estéfanas apxagkok ektamhéyak amonye'e élma megkalya'ásseyam Cristo m'a yókxexma Acaya, tén han éltamheykencha'a chá'a yaqwayam katnahagkok élánésso aqsok ma'a ẽlyáxeg'a aptamhéyak nak melya'ásseyam. 16 Émenyeyk nahan ko'óxa kólyahakxohok chá'a kéxegke m'a énxet'ák ekhawo aptamheykegkaxa nak chá'a xa énxet'ák nak, tén han ma'a apyókxoho appasmo nak chá'a tén han apkeltamheykha nak chá'a xa ektéma nak nentamheykha.
17 Payhekxeyk nahan ko'o ewáxok apwaya Estéfanas, Fortunato, tén han Acaico, hakte cham'a megkólheykencha'a axta kéxegke 18 egkéssegkek axta meyke ektáhakxa sekha, ekhawo nahan apteméssessamakxa kéxegke. Kaltaqmalmakha chá'a kélpeywa kóllának énxet aptéma nak xa.
19 Apcháphássessek kéxegke ekxeyenma apkelwáxok énxet'ák apheykha nak apchaqneykekxexa yókxexma Asia. Apcháphássessek nahan ekyawe ekxeyenma apwáxok yetlo Wesse' egegkok apwesey kéxegke m'a Áquila, tén han Prisca, yetlo m'a énxet'ák apchaqneykekxohol'a chá'a m'a apxagkok. 20 Apcháphássessek kéxegke ekxeyenma apkelwáxok apyókxoho ẽlyáxeg'a. Kólpeykesaxche yetlo ekpayheykekxa kélwáxok.
21 Sektáxéssesso ahagko' ko'o kéxegke s'e ekxeyenma nak ewáxok, ko'o Pablo.
22 Agkok yásekha'awok xama énxet Wesse' egegkok, káhapwaták sa' Dios aplo. ¡Éxyem Wesse' egegkok!
23 Epekkenek sa' chá'a kélnepyeseksa kéxegke Wesse' egegkok Jesús ma'a ektémakxa nak segmésso naqsa ektaqmeleykha apwáxok henlano'. 24 Keytek sa' chá'a kélnepyeseksa kéxegke m'a seyásekhayo eñama nak Cristo Jesús.
© © Enxet Lengua Sur Bible © Paraguayan Bible Society, 2015.