1 Kólteme sektémakxa nak ko'o, ekhawo sektémakxa nak ko'o sekyetlama aptémakxa m'a Cristo.
Kelán'ák kañe' kélaqneykekxexa
2 Ekméssegkek chá'a ko'o ekxeyenma ewáxok kéxegke, hakte kaxénhok chá'a kélwáxok ko'o, kéllenxáneykmók nahan kéllane m'a sektémakxa axta sélxekmósso kéxegke. 3 Éltamhók ko'o kólya'asagkohok kéxegke Cristo apteme chá'a apkemha apmonye' apagkok apyókxoho énxet, keñe énxet apteme apkemha apmonye' agkok ma'a aptáwa', ekhawo ektémakxa nak han Dios apteme apkemha apmonye' apagkok ma'a Cristo. 4 Apchaqlássek agkok apqátek xama énxet aptáha enxoho nempeywa nélmaxnagko, essenhan apkeltenneyncha'a enxoho m'a amya'a eñama nak Dios, emegqaksek ma'a apqátek. 5 Agkok nahan kaqlásak akqátek kelán'a ektáha enxoho nempeywa nélmaxnagko, essenhan ma'a éltenneyncha'a enxoho amya'a eñama nak Dios, kamegqaksek ma'a atáwa' ektáha nak akqátek, máxa katnehek ma'a kelán'a kélmópéssessamól'a ekyese. 6 Agkok kaqlásak akqátek xama kelán'a, tásek kamopaksohok ekyese. Xénchek agkok awáxok kelán'a kamegqaksek ekyaqtenna enxoho áwa', essenhan kamopaksohok ekyese, tásek kaqlaksek chá'a akqátek. 7 Akke kapayhawok chá'a yaqlaksek apqátek ma'a apkenna', hakte énxet apteme kélheyáseykegkoho m'a aptémakxa nak Dios. Kataxkohok chá'a nápát ma'a ektémakxa nak apcheymákpoho Dios, keñe m'a kelán'a, kataxkohok chá'a nát ma'a ektémakxa nak apcheymákpoho m'a énxet. 8 Hakte, háwe axta apkeñamakxa kéltekkessama énxet ma'a kelán'a, énxet axta eyke keñamak élánamáxko m'a kelán'a. 9 Háwe axta nahan kelán'a éñamakxa apkelánamákpo m'a énxet, énxet axta eyke keñamak élánamáxko m'a kelán'a. 10 Cháxa keñamak eyéméxko nak chá'a kaqlaksek akqátek kelán'a magkenatchesso ekha élyaheykekxoho m'a atáwa', eñama m'a Dios apkelásenneykha. 11 Mopwanchek exek meyke aptáwa' énxet, yawanchek nahan kaxek meyke atáwa' kelán'a, nenteme nak negyepetcheyo Cristo. 12 Naqsók eykhe eñama élánamáxche kelán'a m'a énxet, naqsók nahan énxet apkeñama chá'a aptéyam ma'a kelán'a; ekyókxoho aqsok akke ekteme éleñamakxa m'a Dios.
13 Kólxénho kélagko' kéxegke tásek kexaha kalmaxnak Dios kelán'a meyke eyaqlasso akqátek. 14 Nentémakxa eyke chá'a negko'o keñamak senxekmóssama segmegqassamo elwenaqtések apwa' énxet; 15 keñe chá'a kelán'a ekméssama ektaxnémo kalwenaqtések ma'a áwa'; hakte xawáyak axta yaqwayam kalwenaqtések áwa', yaqwayam enxoho kápok ma'a akqátek. 16 Yetneyk agkok nahan xama énxet megkaleklo apwáxok exének xa aqsok nak, kéméxcheyk ey'asagkohok magya'áseykegko negko'o m'a mók apkeltémakxa nak énxet, tén han melya'áseykegko m'a Dios énxet'ák apagkok nak.
Nentawáseykha nempasmo ektaqmela eñama nak Wesse' egegkok
17 Mowanchek ko'o agkések ekpayheykekxa ewáxok kéxegke s'e sektáxéssesa nak kaxwo', hakte máxa entemék eknaqtawáseykencha'a enxoho kéxegke m'a kélaqneykekxexa nak, yaqwayam eykhe kapasmok. 18 Amonye' séltennáseykha axta ko'o séltennásencha'a, apchaqnákxoho enxoho chá'a énxet'ák, ekyetnama chá'a kélexpánchesamaxche kélnepyeseksa kéxegke; nekha axta nahan ko'o ekteméssessók naqsók xa. 19 Megkatnehek eyke megkólexpanchásamáxche kéxegke yaqwayam enxoho kólya'asagkohok ekmámnaqsoho m'a apkelyetleykekxa nak Cristo. 20 Kélaqnákxeyk agkok chá'a kéxegke háwe ekmámnaqsoho Wesse' egegkok nempasmo ektaqmela apagkok ma'a kélteykegko nak chá'a kéxegke. 21 Hakte epekhaksohok chá'a etwok apto kélxama kéxegke, mewagkasók ma'a ekweykenxal'a nentamakxa nento, keñe chá'a nápakha kalnápok meyk, keñe nahan nápakha kalnápok anmen. 22 ¿Mékoya kéxegke tegma kéltamakxa chá'a kélto, tén han kélyeneykegkaxa chá'a kélyenéyak? ¿Yaqsa ektéma kélwanyémo nak kéxegke Dios énxet'ák apagkok, tén han kélméssama apkelmegqakto m'a énxet'ák meyke nak aqsok apagkok? ¿Háxko sa' atnehek alának kéxegke? ¿Axéneya sa' ko'o ektaqmela kéltémakxa kéxegke? Ma', maxének ko'o ektaqmela xa kéltémakxa nak.
Nempasmo ektaqmela
(Mt 26.26-29Mc 14.22-25Lc 22.14-20)23 Ekxawáyak axta ko'o nélxekmowásamáxche eñama nak Wesse' egegkok, cham'a sélxekmóssama axta kéxegke: chaqhémók axta apmoma pan Wesse' egegkok Jesús ma'a axta'a kélpelakkassessamakxa axta kéltémo emakpok, 24 keñe axta natámen apmésso ekxeyenma apwáxok Dios apyeptama nepyeseksa pan. Axta aptemék se'e: “Keso sekyókxoho ko'o s'e, ekmatña nak ekyánmaga kéxegke. Kóllána' sa' chá'a s'e, yaqwayam sa' kaxénwakxohok chá'a kélwáxok ko'o.” 25 Hawók axta anhan aptémakxa natámen aptéyak, apmomchek axta egheykok, axta aptemék se'e: “Keso egheykok ekteme axnagkok ekhémo mók nélpaqhetchásamáxkoho Dios kélteméssessama nak ekmámnaqsoho m'a éma ahagkok nak ko'o, kélyenágkek sa' agkok chá'a, kóllána' sa' chá'a yaqwayam kaxénwakxoho kélwáxok ko'o.” 26 Kéltókagkek sa' agkok chá'a s'e pan nak tén han kélyenágko enxoho chá'a s'e aqsok kélyeta nak egheykok, kéllegássek kéxegke m'a apketsapma axta Wesse' egegkok, ekwokmoho m'a apkexyekmo sa' makham.
Ektémakxa nenlane nempasmo ektaqmela
27 Enxama ektáhakxa enxoho apto Wesse' egegkok pan apagkok, essenhan apyà enxoho m'a kélyeta nak egheykok apagkok, yetlo metaqmelchesso, apkelanak mey'assáxma énmexma nak Wesse' egegkok apyókxa, tén han ma'a éma apagkok nak. 28 Cháxa keñamak eyéméxko nak chá'a anlanok egwáxok enxama amonye' nentéyak ma'a pan nak, tén han amonye' negyenéyak ma'a kélyeta nak Wesse' egegkok egheykok apagkok. 29 Hakte aptókek agkok aqsa enxama, tén han apyena enxoho aqsa meyke ekxeyenma apwáxok ektáha m'a Wesse' egegkok apyókxa, apsexnánémap apagko' sa' etnehek ma'a aptawa enxoho, tén han ma'a apyena enxoho. 30 Cháxa keñamak kélxámokma nak chá'a kéxegke kélháxamáxche, tén han kélyelqamáxche', apkeletsepmeyk nahan chá'a kélnápakha'. 31 Nentaqmelchásawók agkok chá'a sekxók negko'o nenlányo egwáxok, mehenlegássesagkók chá'a m'a Wesse' egegkok. 32 Enlegassásegkók agkok chá'a negko'o Wesse' egegkok, yaqwayam hẽltámeyagkok akke, keñe anhan mantéhek nélsexnánémaxche xamo' ma'a énxet'ák apheykha nak keso náxop.
33 Élyáxeg sélásekhayo, kélaqnákxeyk sa' agkok chá'a kéxegke yaqwayam kóltawagkok, kólleyx chá'a kélmók. 34 Meyk agkok chá'a chaqhak kélxama, tásek etwok apto apxagkok, yaqwayam enxoho mellegássesagkók chá'a Dios eñama kéllane chá'a xa ektéma nak kélaqneykekxa'. Mók aqsok sa' alánekxések kéxegke, cham'a sekwa'akto sa' makham kélheykegkaxa kéxegke.
© © Enxet Lengua Sur Bible © Paraguayan Bible Society, 2015.