Benjamín aptawán'ák neptámen
1 Cinco axta apyókxoho apketchek ma'a Benjamín: apwete apmonye' axta m'a Bela; tén axta Asbel; keñe axta Ahrah; 2 tén axta Nohá; keñe han Rafá. 3 Keso apketchek axta Bela s'e: Adar, Guerá, Abihud, 4 Abisúa, Naamán, Ahóah, 5 Guerá, Sefufán tén han Hiram.
6 Keso Ehud axta apketchek, apkelámha apmonye'e apagkok axta m'a aphawóxama apheykha axta m'a Gueba, kélántekkessama axta kélya'áseykekxo Manáhat: 7 Naamán, Ahías tén han Guerá, apyáp axta m'a Uzá tén han Ahitud, ektáha axta apnaqlo.
8 Apweteykekxeyk axta makham pók apketchek Saharaim ma'a yókxexma nak Moab, natámen axta apkexakha m'a apnaqteyegka'a, cham'a Husim tén han Baará. 9 Keso apketchek ekwete axta m'a kaxwe aptáwa' ekwesey axta Hodes: Jobab, Sibiá, Mesá, Malcam, 10 Jeús, Saquías tén han Mirmá. Cháxa apketchek axta xa, aptamhéyak axta apkelámha apmonye'e m'a nepyeseksa nak aphawóxama.
11 Tén ma'a aptáwa' ekwesey axta Husim, ekweteya apqánet étchek, cham'a Abitub tén han Elpáal. 12 Elpáal axta apketchek se'e: Éber, Misam tén han Sémed, ektáha axta apkelane m'a tegma apkelyawe nak Onó tén han Lod, yetlo m'a tegma apketkók apagkok; 13 Beriá tén han Sema, apkelámha apmonye'e axta m'a nepyeseksa nak aphawóxama apheykha axta m'a Aialón, ektáha axta apkelántekkesso m'a énxet'ák nanók apheykegkaxa axta m'a Gat; 14 tén han ma'a apkelyáxeg'a Sasac tén han Jeroham.
15 Zebadías, Arad, Ader, 16 Micael, Ispá tén han Johá, cháxa Beriá axta apketchek xa. 17 Zebadías, Mesulam, hizquí, Éber, 18 Ismerai, Izlías tén han Jobab, cháxa Elpáal axta apketchek xa. 19 Jaquim, Zicrí, Zabdí, 20 Elienai, Siletai, Eliel, 21 Adaías, Beraías tén han Simrat, cháxa Simí axta apketchek xa. 22 Ispán, Éber, Eliel, 23 Abdón, Zicrí, Hanán, 24 Hananías, Elam, Anatotías, 25 Ifdaías tén han Peniel, cháxa Sasac axta apketchek xa. 26 Samserai, Seharías, Atalías, 27 Jaresías, Elías tén han Zicrí, cháxa Jeroham axta apketchek xa. 28 Cháxa apkelámha apmonye'e axta chá'a nepyeseksa aphawóxama, ektáhakxa nak chá'a aptawán'ák apagko', apheykencha'a axta m'a Jerusalén.
Saúl aphawóxama
(1 Cr 9.35-44)29 Axta aphak Jehiel ma'a tegma apwányam nak Gabaón, Gabaón axta apyáp. Maacá axta ekwesey aptáwa'. 30 Keso apketchek axta s'e: Abdón, apteme axta átnaha apketkok, Sur, Quis, Baal, Ner, Nadab, 31 Guedor, Ahió, Zéquer 32 tén han Miclot, Simí axta apyáp. Temegkek axta m'a ektémakxa axta apheykha m'a apkelpepma, apheykha axta xamo' ma'a Jerusalén.
33 Quis axta apyáp ma'a Ner, Saúl axta apyáp ma'a Quis, keñe Jonatán apyáp ma'a Saúl, tén han ma'a Malquisúa, Abinadab tén han Es-baal. 34 Jonatán axta apketche m'a Merib-baal, apyáp axta m'a Micaías. 35 Micaías axta apketchek se'e: Pitón, Mélec, Tarea tén han Ahaz. 36 Joadá axta apyáp ma'a Ahaz, keñe Alémet apyáp ma'a Joadá, tén han Azmávet tén han Zimrí; Mosá axta apyáp ma'a Zimrí, 37 keñe axta Biná apyáp ma'a Mosá, apyáp axta m'a Rafá, cham'a apyáp axta Elasá, cham'a Elasá, apyáp axta m'a Asel.
38 Seis axta apyókxoho apketchek Asel, keso apkelwesey axta s'e: Azricam, Bocrú, Ismael, Searías, Abdías tén han Hanán. Cháxa Asel axta apketchek xa.
39 Ésec apyáxeg axta apketchek se'e: Ulam, apteme axta átnaha apketkok; keñe axta aptétéyak Jehús, keñe han Elifélet aptáhakxa axta apqántánxo. 40 Sẽlpextétamo apkelyennaqte axta han ma'a Ulam apketchek, apmopwancha'a apkelmeykha yágke. Apxámok apagko' axta han ma'a apketchek tén han aptawán'ák, ciento cincuenta axta apyókxoho, Benjamín aptawán'ák neptámen axta xa apyókxoho nak.
© © Enxet Lengua Sur Bible © Paraguayan Bible Society, 2015.