Judá aptawán'ák neptámen
1 Judá apketchek axta s'e: Fares, Hesrón, Carmí, Hur tén han Sobal. 2 Reaías, Sobal axta apketche, Jáhat axta apyáp, keñe axta Ahumai tén han Láhad apyáp ma'a Jáhat. Cháxa soratitas axta apnámakkok xa.
3-4 Hur apketchek axta s'e: Etam, Jezreel, Ismá, Idbás, Penuel, Guedor axta apyáp, tén han Éser, Husá axta apyáp. Haslelponi axta ekwesey apyáxeg kelwána xa énxet'ák nak. Cháxa apketchek axta m'a Hur, étche átnaha apketkok axta m'a Efrata, Belén axta apyapmeyk nano'.
5 Ánet axta apnaqteyegka'a m'a Ashur, Tecoa axta apyáp: cham'a Helá tén han Naará. 6 Naará axta étchek ma'a Ahuzam, Héfer, Temení tén han Ahastarí. Cháxa Naará axta étchek xa. 7 Helá axta étchek se'e: Séret, Jesohar tén han Etnán.
8 Cos axta apketchek ma'a Anub tén han Sobebá, apyapmeyk nanók axta m'a Aharhel apnámakkok, Harum axta apketche.
9 Apxénamap yókxoho yókxexma axta han nepyeseksa apkelyáxeg ma'a Jabés, Jabés axta han teméssessók apwesey m'a egken. Hakte axta temék se'e: “Yetlo seklegeykegkoho ekmáske axta ko'o ektegkessók.” 10 Axta aptemék Jabés appaqhetchessama m'a Dios nak Israel: “Éltamhók ko'o kataqmalmakha apwáxok xép hélano', keñe han hegkések xama yókxexma ekyawe agko', tén han hepasmok hemallahanchesek aqsok ekmaso, yaqwayam enxoho ko'o manyegko'.” Apméssegkek axta han Dios ma'a aqsok apkelmaxnagko.
11 Mehír axta apyáp ma'a Quelub, Suhá axta apyáxeg; keñe axta Estón apyáp ma'a Mehír; 12 Bet-rafá axta apyáp ma'a Estón, tén han Paséah, tén han Tehiná, apxátekhasso axta m'a tegma apwányam Nahas. Cháxa apheykha axta m'a Recá.
13 Quenaz apketchek axta s'e: Otoniel tén han Seraías. Otoniel apketchek: Hatat 14 tén han Meonotai, Ofrá axta apyáp. Seraías axta apyáp ma'a Joab, apyapmeyk nanók axta m'a apheykha axta m'a ekyapwátegweykenxa xapop nak Harasim, apkelánéyak axta chá'a aqsok.
15 Keso Caleb axta apketchek, Jefuné axta apketche: Ir, Elá tén han Náam. Elá axta apyáp ma'a Quenaz.
16 Jahaleel axta apketchek se'e: Zif, Zifá, Tirías tén han Asarel.
17-18 Esdras axta apketchek s'e: Jéter, Méred, Éfer tén han Jalón. Kelyamhopmeyk axta Méred apmoma m'a Bitiá, apketche kelwána axta m'a faraón, keso apketchek axta s'e: María, Samai tén han Isbah, Estemoa axta apyáp. Apmomchek axta han Méred xama kelán'a eñama axta nepyeseksa m'a Judá énxet'ák apagkok, cha'a egken axta m'a Jéred, Guedor axta apyáp, tén han ma'a Héber, Socó axta apyáp, tén han ma'a Jecutiel, Zanóah axta apyáp.
19 Keso Hodías axta aptáwa' étchek se'e, Náham axta apyáxeg, Queilá axta apyáp: Daliá apteme axta garmita, tén han Estemoa apteme axta maacateo.
20 Keso Simón apketchek axta s'e: Amnón, Riná, Ben-hanán tén han Tilón.
Isí axta apketchek se'e: Zohet tén han Ben-zohet.
21 Keso Selá axta aptawán'ák neptámen, Judá axta apketche: Er, Lecá axta apyáp, Ladá, Maresá axta apyáp, apnámakkok axta m'a apkelóteykegkoho axta chá'a lino m'a yókxexma Bet-asbea, 22 tén han Joaquim, apheykencha'a axta m'a Cozebá, Joás tén han Saraf, apkelmeykegko axta moabitas aptamheykegko apnaqteyegka'a, keñe apkelmeyeykento makham Belén, ekhawo ektémakxa nak nanók eknaqtáxésamaxche'. 23 Cháxa apkelánéyak axta chá'a yátegwáxwa xa; apheykencha'a axta m'a Netaim tén han Guederá, apkelásenneykencha'a axta chá'a m'a wesse' apwányam.
Simeón aptawán'ák neptámen
24 Simeón axta apketchek se'e: Nemuel, Jamín, Jarib, Zérah tén han Saúl. 25 Saúl axta apyáp ma'a Salum; Salum axta apyáp ma'a Mibsam, tén axta Mismá apyáp ma'a Mibsam.
26 Mismá axta apyáp ma'a Hamuel; cháxa apyáp axta han ma'a Zacur, keñe axta Zacur apketche m'a Simí. 27 Dieciséis axta apketchek apkelennay'a m'a Simí, keñe seis ma'a apketchek kelwán'ák; keñe axta m'a apkelyáxeg'a nak apqántawok axta apketchek, axta keñamak mexámokma m'a apnámakkok apagko' nak, axta katneyk ma'a ektémakxa axta m'a Judá aptawán'ák neptámen. 28 Apheykha axta m'a Beerseba: Moladá, Hasar-sual, 29 Bilhá, Ésem, Tolad, 30 Betuel, Hormá, Siclag, 31 Bet-marcabot, Hasar-susim, Bet-birai tén han Saaraim. Cháxa tegma apkelyawe apagkok axta xa, ekweykmoho axta aptéma wesse' apwányam ma'a David. 32 Yetneyk axta han cinco apkelókxa: cham'a Etam, Ain, Rimón, Toquen tén han Asán, 33 yetlo m'a tegma apketkók aphéyak axta nepyáwa xa tegma apkelyawe ekweykekxoho m'a Baalat. Keso apheykegkaxa axta yókxexma, yetlo eknaqtáxésamaxche' apkelwesey m'a aphawóxama apagko' nak chá'a.
34 Mesobab, Jamlec, Josías, Amasías axta apketche, 35 Joel, Jehú, Josibías axta apketche, Josibías, Seraías axta apketche, Seraías, Asiel axta apketche; 36 Elioenai, Jaacoba, Jesohaías, Asaías, Adiel, Jesimiel, Benaías, 37 Zizá, Sifi axta apketche, cham'a Sifi Alón axta apketche, cham'a Alón Jedaías axta apketche, cham'a Jedaías, Simrí axta apketche, cham'a Simrí Semaías axta apketche. 38 Cháxa apkelámha apmonye'e axta chá'a nepyeseksa apnámakkok apancha'awók xa apkelxénákpo nak. Apxámeykegkók apagko' axta m'a apnámakkok apancha'awo' nak, 39 apkelweykmók axta aptegyáseykencha'a pa'at nepkések apnaqtósso m'a nentaxnamakxa nak Guerar, ekpayho nak ekteyapmakxa ekhem ma'a ekyapwátegweykenxa nak xapop. 40 Axta apkelwetágweykmok pa'at ektaqmalma m'a, kaxwe éltekteyapma tén han ekxámokma agko', awanhek axta exma, méko axta ektemégweykmoho exma tén han negekakxa'. Axta apheykha han nanók ma'a Cam aptawán'ák neptámen, 41 apkelwayak axta eyke m'a apkelxénákpo exchek, aphamakxa axta makham wesse' apwányam Ezequías ma'a Judá, apmassésseykmek axta apyókxoho meyke néxa, yetlo m'a apkelpakxeneykegkaxa axta, tén han apheykegkaxa, aphéyak axta m'a, keñe apyaqmagkassama apheykegkaxa, hakte yetneyk axta pa'at yaqwayam elagkok ma'a nepkések apnaqtósso. 42 Quinientos énxet'ák axta han apkelmaheykegkok ma'a egkexe nak Seír, Simeón axta aptawán'ák neptámen. Axta apkelámha apmonye'e m'a Pelatías, Nearías, Refaías tén han Uziel, Isí axta apketchek, 43 keñe apmassésseykmo m'a amalecitas apkeleymomap axta. Keñe apkelheykmoho m'a ekweykmoho makham se'e kaxwo' nak.
© © Enxet Lengua Sur Bible © Paraguayan Bible Society, 2015.