Átog apkeláneykha tén han pók énxet'ák apkeltamheykha
1 Keso ektáhakxa axta chá'a apkelyésamap yaqwánxa chá'a emok apkeltamheykha átog apkeltaqmelchesso s'e:
Coreítas axta s'e: Meselemías, Coré axta apketche, cham'a Coré, Ebiasaf axta apketche. 2 Meselemías axta apketchek se'e: Zacarías axta átnaha apketkok; Jediael axta aptétéyak; keñe Zebadías; Jatniel; 3 Elam; Johanán, keñe han Eliehoenai.
4 Obed-edom axta apketchek se'e: Semaías axta átnaha apketkok; Jozabad axta aptétéyak; Joah; Sacar; Natanael; 5 Amiel; Isacar, keñe han Peultai. Hakte appasmomchek axta Dios Obed-edom apkelméssama apxámokma apketchek.
6 Apqánet axta apketchek ma'a Semaías, Obeb-edom axta apketche, cham'a aptamheykegko axta apkeltaqmelchesso apnámakkok, hakte énxet apkelmopwancha'a elanagkok aqsok axta m'a. 7 Semaías axta apketchek se'e: Otní, Rafael, Obed, Elzabad, Elihú tén han Samaquías, énxet apmopwancha'a elanagkok aqsok axta xa. 8 Énxet'ák apmopwancha'a elanagkok aqsok axta han xa Obed-edom aptawán'ák neptámen, ekweykekxoho m'a apketchek tén han apkelyáxeg'a nak, apmelyeyha'ak axta han eltemeykha. Sesenta y dos axta han apyókxoho m'a Obed-edom aptawán'ák neptámen.
9 Yetneyk axta han apketchek ma'a Meselemías, tén han apkelyáxeg, dieciocho axta apyókxoho, énxet'ák apmopwancha'a elanagkok aqsok axta han xa.
10 Hosá axta apketchek se'e, Merarí axta aptawán'ák neptámen: Simrí, apteme axta apkemha apmonye', háwe axta eykhe apketche átnaha apketkok, apyáp axta eyke apteméssesso apkemha apmonye'; 11 Hilquías axta aptétéyak; Tebalías; tén han Zacarías. Trece axta apyókxoho m'a Hosá apnámakkok, apketchek tén han apkelyáxeg.
12 Cháxa élpehewayam axta yaqwayam eltemeykha m'a átog nak, hawók axta mók apkeltamheykha m'a tegma appagkanamap nak, cham'a apkelámha apmonye'e nak, tén han ma'a apkelxegexma'a nak. 13 Apkelyésakpek axta han chá'a xama ektáhakxa nak chá'a apnámakkok, yaqwayam ey'asagkohok yaqwánxa chá'a etaqmelchesek átog, appasmeyk axta m'a apxámokma nak, tén han ma'a apqántawo' nak.
14 Selemías axta pehewokmok yaqwayam etnehek aptaqmelchesso m'a átog ekpayho nak ekteyapmakxa ekhem, keñe m'a apketche apwesey nak Zacarías, apteme axta ektaqmalma chá'a apmésso appeywa m'a apnámakkok, ekpehewokmo m'a ekpayho nak nexcheyha. 15 Keñe Obed-edom ekpehewokmo m'a ekpayho nak nepyeyam, tén axta apketchek élpehewokmo yaqwayam etnehek apkeltaqmelchesso ekheykegkaxa nak aqsok ma'a tegma appagkanamap nak. 16 Keñe Hosá ekpehewokmo m'a ekpayho nak taxnegwánxa ekhem, átog nak ma'a Saléquet, cham'a ámay ekmeyeykekxa nak néten.
Keso ektémakxa axta kélmeyáseyak apkeltamheykha s'e: 17 seis énxet'ák axta chá'a apkeláneykha xama ekhem ma'a átog ekpayho nak ekteyapmakxa ekhem, cuatro m'a nexcheyha tén han cuatro m'a ekpayho nak nepyeyam, keñe apqánet chá'a yaqwayam etnehek aptaqmelchesso xama m'a ekheykegkaxa nak aqsok. 18 Keñe m'a kélhaxtegkesso ekpayho nak ektaxnegwánxa ekhem, yetneyk axta cuatro énxet aptaqmelchesso m'a ámay nak, apqánet ma'a kañe' apwáxok nak. 19 Cháxa ektémakxa axta apkelxawéyak apkeltamheykha m'a apkeláneykha nak átog, Coré aptawán'ák neptámen axta, tén han Merarí.
20 Nápakha levitas axta apkelánémakpok etnehek apkeltaqmelchesso m'a aqsok élmomnáwa ekhéyak axta m'a tegma appagkanamap nak, keñe han kélnegkenmakxa nak aqsok kélmésso naqsa Dios. 21 Ladán apketchek, aptawán'ák neptámen axta m'a Guersón tén han Jehiel, 22 Jehiel apketchek tén han ma'a apketchek axta apkelyáxeg Zetam keñe han Joel, axta apkeltaqmelchesso m'a aqsok élmomnáwa ekhéyak nak tegma appagkanamap.
23 Keñe m'a Amram, Ishar, Hebrón tén han Uziel axta aptawán'ák neptámen, 24 axta apkeltaqmelchesso aqsok élmomnáwa m'a Sebuel, Guersón axta aptáwen neptámen tén han Moisés.
25 Axta apnámakkok ma'a Rehabías, Eliézer axta apnámakkok, Eliézer apketche; tén han Isaías, Rehabías axta apketche; keñe han ma'a Joram, Isaías axta apketche; tén han ma'a Zicrí, Joram axta apketche; keñe han ma'a Selomit, apketche axta m'a Zicrí.
26 Selomit tén han apkelyáxeg axta apkeláneykha m'a ekyókxoho ekheykegkaxa nak aqsok kélmésso Dios, apnegkenchesso axta chá'a Wesse' egegkok ma'a David, tén han ma'a apkelámha apmonye'e nak apnámakkok, sẽlpextétamo apkelwesse'e keñe han ma'a apkelxegexma'a nak, yetlo m'a sẽlpextétamo ekyawakxa nak kéláyo. 27 Apkelenmexma axta apkelyementaméyak neyseksa kempakhakma xa aqsok nak, keñe axta apteméssessama yaqwayam kapasmok chá'a m'a tegma appagkanamap nak. 28 Heykegkek axta han aqsok ma'a apkelmésso axta m'a Samuel, apteme axta apwetayo aqsok apxekmósso Dios, tén han Saúl, Quis axta apketche, keñe han Abner, Ner axta apketche, tén han Joab, Seruiá axta étche. Selomit yetlo apkelyáxeg'a axta apkeltaqmelchesso xa ekyókxoho aqsok kélpagkanchesso nak Dios.
29 Quenanías tén han apketchek, Ishar axta aptawán'ák neptámen, axta chá'a apnaqtáxéseyak ma'a ektémakxa axta chá'a apwete m'a neyáwa nak Israel, axta apkeláneykha han chá'a m'a sẽlpextétamo, tén han énxet'ák segyekpelchémo.
30 Hasabías tén han ma'a apnámakkok, Hebrón axta aptawán'ák neptámen, cham'a apwayam axta apyókxoho mil setecientos apmopwancha'a elanagkok aqsok, cháxa apkeláneykha axta chá'a ektémakxa aqsok ma'a neyp Jordán, tén han aqsok élánamáxko axta chá'a m'a eñama nak Wesse' egegkok, tén han ma'a aphakxa nak wesse' apwányam; 31 Kelánamáxchekxeyk axta amya'a yaqwayam kólya'asagkohok apweykenxa axta chá'a apnámakkok énxet'ák, Hebrón axta aptawán'ák neptámen, cham'a ekweykmo axta cuarenta apyeyam apteme wesse' apwányam David. Wetamaxcheyk axta han apyetnama nepyeseksa énxet'ák apmopwancha'a nak elanagkok aqsok ma'a Jazer ekpayho nak yókxexma Galaad. Jerías axta apkemha apmonye' nepyeseksa m'a Hebrón axta aptawán'ák neptámen; 32 Dos mil setecientos apkelámha apmonye'e nepyeseksa apnámakkok axta apyókxoho m'a apmopwancha'a nak apkeláneyak aqsok, ekweykekxoho m'a apnámakkok nak. Aptemessáseykegkek axta wesse' apwányam David yaqwayam elanha m'a Rubén énxet'ák apagkok, tén han Gad, keñe han ma'a nápakha nak Manasés énxet'ák apagkok, tén han ma'a ekyókxoho aqsok élánamáxche nak chá'a éleñama Dios tén han ma'a wesse' apwányam nak.
© © Enxet Lengua Sur Bible © Paraguayan Bible Society, 2015.