Apkelmeneykmasso tén han apkelpáwasso
1 Keñe axta David tén han apkelámha apmonye'e nak levítas apkelmeyásegko chá'a apkeltamheykha nempeywa apkeláneyak ma'a Asaf apketchek, Hemán tén han Jedutún, apkeltenneykencha'a axta chá'a Dios appeywa yetlo apkelpáwasso arpa, yát'axpog tén han ma'a ekho nak sokpayhe étkók élyaqye. Keso apkelwesey ektáha axta apkelxawéyak yaqwayam etnahagkok xa ektáha nak.
2 Asaf axta apketchek se'e: Jacur, José, Netanías tén han Asarela. Asaf axta chá'a apxegkessesso, apyáp axta xa énxet'ák nak, apxeyenmo axta chá'a m'a amya'a eñama nak Dios, apkeltémo axta chá'a etnehek ma'a wesse' apwányam.
3 Seis axta apketchek ma'a Jedutún: Guedalías, Serí, Isaías, Simí, Hasabías tén han Matatías. Jedutún axta apxegkessesso chá'a, apyáp axta xa énxet'ák nak, apxeyenmo axta chá'a amya'a eñama nak Dios, yetlo kélpáwássesso m'a arpa yaqwayam egkések ekxeyenma apwáxok Dios tén han elpeykesho'.
4 Hemán axta apketchek se'e: Buquías, Matanías, Uziel, Sebuel, Jeremot, Hananías, Hananí, Eliatá, Guidalti, Romamti-ézer, Josbecasa, Malotí, Hotir tén han Mahaziot. 5 Hemán axta apketchek xa apyókxoho nak, apteme axta apwetayo chá'a aqsok apxekmósso Dios, apkeláneykha m'a wesse' apwányam, ekhawo m'a ektémakxa axta apkeltennassama Dios apxeyenmakxa etnéssesek egkések ekyawe agko' apmopwána; axta keñamak Dios apméssama catorce apketchek apkelennay'a m'a Hemán, keñe ántánxo m'a apketchek kelwán'ák. 6 Apyáp axta chá'a exegkessesek apkelmeneykmasa enxoho chá'a elanagkok nempeywa m'a tegma appagkanamap, cháxa apyókxoho nak, yetlo apkelpáwasso m'a ekho nak sokpayhe étkók élyaqye, yát'axpog tén han arpa.
Asaf, Jedutún tén han Hemán, axta chá'a apkelánéyak ma'a apkeltémókxa axta chá'a etnahagkok ma'a wesse' apwányam. 7 Doscientos ochenta y ocho axta apyókxoho m'a apmopwancha'a nak apkelmeneykmasso, ekweykekxoho apkelxegexma'a ektáha axta kélxekmowáseyak yaqwayam elmeneykmássesek ma'a Wesse' egegkok.
8 Xama aqsok axta chá'a katwasaxchek nepyeseksa yaqwayam enxoho kólya'asagkohok ekhem yaqwánxa chá'a elmeneykmaksek, cham'a apkelwányam nak, tén han ma'a apketkók nak, keñe han ma'a apkelxekmósso nak, tén han ma'a apkeltámeséyak nak.
9-31 Xama axta ekpenchásexko ektawásamáxche aqsok, axta táhak chá'a yaqwayam eltemeykha s'e, eyeynmo 1, ekweykmoho 24:
José
Guedalías
Zacur
Isrí
Netanías
Buquías
Jesarela
Isaías
Matanías
Simí
Azarel
Hasabías
Subael
Matatías
Jeremot
Hananías
Josbecasa
Hananí
Malotí
Eliatá
Hotir
Guidalti
Mahaziot
Romamti-ézer.
Doce axta apyókxoho xa énxet'ák nak.
© © Enxet Lengua Sur Bible © Paraguayan Bible Society, 2015.