1 Yetneyk axta chá'a ekhem yaqwánxa eltemeykha m'a Aarón axta aptawán'ák neptámen. Aarón axta apketchek se'e: Nadab, Abihú, Eleazar tén han Itamar. 2 Apkelmaxnéssesso Dios énxet'ák apagkok axta aptamheykegkok ma'a Eleazar tén han Itamar, hakte apkeletsepmeyk axta Nadab tén han Abihú, megyetsapmakxa axta makham ma'a apyáp, keñe han neyseksa melwete apketchek.
3 Appasmeyk axta David ma'a Sadoc, Eleazar axta aptáwen, keñe han Ahimélec, Itamar axta aptáwen, yaqwayam yexpánchesek chá'a yaqwánxa elanagkok apkeltamheykha m'a. 4 Apxámok axta m'a Eleazar axta aptawán'ák neptámen, axta exnawok ma'a Itamar axta aptawán'ák neptámen, la'a kélexpánchesa axta yaqwayam enxoho etnekxak dieciséis apkelámha apmonye'e apagkok ma'a Eleazar axta aptawán'ák neptámen, keñe ocho m'a Itamar axta aptawán'ák neptámen. 5 Xama aqsok axta han aptawásegkok apkexpánchesa yaqwánxa chá'a eltemeykha nepyeseksa m'a apyókxoho nak, hakte yetneyk axta chá'a apkeltamheykha apkelpagkanamap nepyeseksa m'a Eleazar axta aptawán'ák neptámen, tén han Itamar axta aptawán'ák neptámen, tén han Dios apkeláneykha.
6 Keñe Semaías aptáxésso axta chá'a weykcha'áhak, Natanael axta apketche, apteme axta han levita, apnaqtáxesagkek axta apkelwesey nápaqtók wesse' apwányam, tén han nápaqta'awók ma'a apkelámha apmonye'e nak, keñe han ma'a apkelmaxnéssesso Dios énxet'ák apagkok Sadoc, tén han Ahimélec, Abiatar axta apketche, tén han ma'a apkelámha apmonye'e axta chá'a aphawóxama, apkelmaxnéssesso axta Dios énxet'ák apagkok, tén ma'a levitas. Ánet apkeltamheykha axta payhémók chá'a yaqwayam elanagkok ma'a Eleazar axta aptawán'ák neptámen, keñe axta xama m'a Itamar axta aptawán'ák neptámen.
7-18 Xama axta ekpenchásexko ektawásamáxche aqsok, axta táhak chá'a yaqwayam eltemeykha s'e, eyeynmo 1, ekweykmoho 24:
Joiarib
Jedaías
Harim
Seorim
Malquías
Mijamín
Cos
Abías
Jesús
Secanías
Eliasib
Jaquim
Hupá
Jesebab
Bilgá
Imer
Hezir
Pisés
Petahías
Hezequiel
Jaquín
Gamul
Delaías
Maazías.
19 Cháxa ektáhakxa axta kélexpánchesa yaqwánxa chá'a katnehek apkeltamheykha m'a tegma appagkanamap nak, ektémakxa nak apchánamakxa m'a Wesse' egegkok, Dios apagkok nak Israel, apkeltémo axta etnahágkok, Aarón axta eyke apchásenneykekxa', apyapmeyk nanók axta m'a énxet'ák nak.
20 Keso levitas ektáha axta apkeleymomap se'e: Subael, Amram axta aptawán'ák neptámen; Jehedías, apkeñama axta m'a nepyeseksa axta Subael aptawán'ák neptámen; 21 Isías, apteme axta átnaha apketkok, apkeñama axta nepyeseksa m'a Rehabías aptawán'ák neptámen; 22 Selomot, apkeñama axta nepyeseksa Ishar aptawán'ák neptámen; Jáhat, apkeñama axta m'a nepyeseksa Selomot aptawán'ák neptámen; 23 Keñe axta Hebrón aptawán'ák neptámen se'e: Jerías, apteme axta átnaha apketkok; Amarías axta aptétéyak; keñe axta Jahaziel; tén han Jecamán, aptáhakxa axta cuatro. 24 Axta han ma'a: Micaías, Uziel axta apketche; tén han Samir, Micaías axta apketche; 25 Isías, Micaías axta apyáxeg; Zacarías, Isías axta apketche; 26 Mahli tén han Musí, Merarí axta apketchek; tén han Jaazías axta apketchek, apketche axta han ma'a Merarí. 27 Merarí aptawán'ák neptámen, Jaazías axta apketchek, cham'a Sóham, Zacur tén han Ibrí; 28 keñe Mahli apketche m'a Eleazar, cham'a méteya axta apketchek, 29 keñe han Quis; tén han Jerahmeel, Quis axta apketche; 30 Musí axta apketchek se'e: Mahli, Éder tén han Jerimot.
Cháxa ektáha axta levitas apnámakkok apancha'awók xa. 31 Xama aqsok axta han tawásexcheyk kélmeyásegko apkeltamheykha xa énxet'ák nak, apnámakkok nak chá'a m'a apkemha apmonye' nak, keñe han ma'a apyáxeg nak, ekhawo han ma'a apteme apnámakkok nak, Aarón axta aptawán'ák neptámen. Nápaqtók ma'a wesse' apwányam David, Sadoc, Ahimélec, tén han apkelámha apmonye'e apnámakkok, apkelmaxnéssesso Dios énxet'ák apagkok, tén han ma'a levitas.
© © Enxet Lengua Sur Bible © Paraguayan Bible Society, 2015.