Israel apketchek
(Gn 35.22-26)1 Keso Israel apketchek axta s'e: Rubén, Simeón, Leví, Judá, Isacar, Zabulón, 2 Dan, José, Benjamín, Neftalí, Gad tén han Aser.
Judá aptawán'ák neptámen
3 Judá apketchek: Er, Onán tén han Selá. Súa apketche kelwána axta étchek xa apqántánxo nak, ekteme axta cananea. Asagko' agko' axta eyke aptémakxa m'a Er, apketche átnaha apketkok axta Judá, la'a apchaqheykekxo axta Wesse' egegkok. 4 Apqánet axta étchek ma'a Tamar, cham'a Fares tén han Zérah, Judá axta aptánegken. Cinco axta apyókxoho apketchek ma'a Judá.
5 Fares apketchek: Hesrón tén han Hamul. 6 Zérah apketchek: Zimrí, Etán, Hemán, Calcol tén han Dardá, cinco axta apyókxoho.
7 Carmí axta apketche m'a Acar, apkelsexnenagkama axta eyáhapwaya ekmaso apheykha m'a énxet'ák Israel, apkelmoma axta m'a aqsok apkeltémo axta kólmasséssók ekyókxoho m'a Dios. 8 Etán axta apketche m'a Azarías.
9 Hesrón apketchek: Jerahmeel, Ram tén han Quelubai.
10 Ram axta apyáp ma'a Aminadab, keñe axta Nahasón apyáp ma'a Aminadab, apteme axta apkemha apmonye' apagkok ma'a Judá aptawán'ák neptámen. 11 Nahasón axta apyáp ma'a Salmá, keñe axta Booz apyáp ma'a Salmá, 12 Booz axta apyáp ma'a Obed, keñe axta Jesé apyáp ma'a Obed, 13 Jesé axta apyáp ma'a Eliab, apwete apmonye' apketche axta; keñe axta aptétéyak ma'a Abinadab, tén han Simá; 14 tén han Natanael; tén han Radai; 15 tén han Ósem, keñe axta axayók agko' ma'a David, aptáhakxa axta siete apketchek. 16 Keso apkelyáxeg kelwán'ák axta s'e: Seruiá tén han Abigail. Apqántánxo axta étchek ma'a Seruiá: Abisai, Joab tén han Asael. 17 Xama axta étche m'a Abigail apwesey axta Amasá, apyáp axta m'a Jéter, apteme axta ismaelita.
18 Caleb, Hesrón apketche, aptáwa' axta ekwesey Azubá, weteyak axta xama étche apwesey axta Jeriot. Tén axta han pók étchek se'e: Jéser, Sobab tén han Ardón. 19 Xama axta étsapma Azubá, keñe Caleb apmeykekxo aptéma aptáwa' m'a Efrata, apwetassegkek axta han xama étche: cham'a Hur. 20 Hur axta apyáp ma'a Urí, keñe axta Besalel apyáp ma'a Urí.
21 Sesenta apyeyam apagkok axta Hesrón élyamhopma apmoma m'a Maquir apketchek kelwána, apyáp axta m'a Galaad, apwetassegkek axta han xama étche: cham'a Segub. 22 Segub axta apyáp ma'a Jaír, cham'a apheykegko axta han veintitrés tegma apkelyawe apagkok ma'a yókxexma nak Galaad. 23 Keñe axta Guesur tén han Aram apkelmoma m'a apkelpakxeneykegkaxa axta Jaír, tén han ma'a Quenat yetlo m'a tegma apketkók agkok; sesenta axta apyókxoho m'a tegma apkelyawe. Maquir aptawán'ák neptámen axta han apagkok xa apyókxoho nak, Galaad axta apyáp.
24 Natámen apketsapma axta Hesrón, keñe Caleb apmeykekxo m'a Efrata, aptáwa' axta m'a apyáp Hesrón, apwetassegkek axta han xama étche: cham'a Ashur, cháxa aptáha axta han apyáp ma'a Tecoa.
25 Keso apketchek axta Jerahmeel, apketche átnaha apketkok axta m'a Hesrón: Ram, apteme axta átnaha apketkok, Buná, Oren, Ósem tén han Ahías. 26 Yetneyk axta han mók kelán'a aptáwa' m'a Jerahmeel, ekwesey axta Atará, egken axta m'a Onam.
27 Keso apketchek axta Ram, átnaha apketkok apketche axta m'a Jerahmeel: Maas, Jamín tén han Équer. 28 Onam apketchek: Samai tén han Jadá.
Samai apketchek: Nadab tén han Abisur. 29 Abihail axta ekwesey aptáwa' m'a Abisur, cha'a egken axta m'a Ahbán tén han Molid.
30 Nadab apketchek: Séled tén han Apaim. Apketsepmeyk axta Séled meykexho apketchek. 31 Apaim axta apyáp ma'a Isí. Isí axta apyáp ma'a Sesán. Sesán axta apyáp ma'a Ahlai.
32 Keso Jadá axta apketchek, Samai axta apyáxeg: Jéter tén han Jonatán. Apketsepmeyk axta Jéter meykexho apketchek. 33 Jonatán apketchek: Pélet tén han Zazá.
Cháxa Jerahmeel axta aptawán'ák neptámen xa.
34 Axta eteyk apketchek apkelennay'a m'a Sesán: kelwán'ák axta aqsa. Yetneyk axta eyke apchásenneykha naqsa egipcio apwesey axta Jarhá, 35 cháxa apméssama axta xama apketche yaqwayam etnehek aptáwa', apwetassama axta han xama étche apkenna apwesey axta Atai. 36 Atai axta apyáp ma'a Natán, Natán axta apyáp ma'a Zabad, 37 Zabad axta apyáp ma'a Eflal, Eflal axta apyáp ma'a Obed, 38 Obed axta apyáp ma'a Jehú, Jehú axta apyáp ma'a Azarías, 39 Azarías axta apyáp ma'a Heles, Heles axta apyáp ma'a Elasá, 40 Elasá axta apyáp ma'a Sismai, Sismai axta apyáp ma'a Salum, 41 Salum axta apyáp ma'a Jecamías, keñe axta Jecamías apyáp ma'a Elisamá.
42 Keso Caleb axta apketchek, apyáxeg axta m'a Jerahmeel: Mesá, apteme axta átnaha apketkok, apyáp axta m'a Zif, tén han Maresá, apteme axta pók apketche, apyáp axta m'a Hebrón. 43 Hebrón apketchek: Coré, Tapúah, Réquem tén han Sema. 44 Sema axta apyáp ma'a Ráham, apyáp axta m'a Jorcoam; tén han Réquem, apyáp axta m'a Samai. 45 Samai axta apketche m'a Maón, apyáp axta m'a Bet-sur.
46 Efá axta egken ma'a Harán, Mosá tén han Gazez, kelán'a apmeykha naqsa axta m'a Caleb. Harán axta apyáp ma'a Gazez.
47 Keso Jahdai axta apketchek se'e: Réguem, Jotam, Guesán, Pélet, Efá tén han Sáaf.
48 Maacá axta ekwesey egken ma'a Séber tén han Tirhaná, kelán'a apmeykha naqsa axta m'a Caleb. 49 Sáaf axta han egken ma'a, apyáp nak ma'a Madmaná, tén han Sevá, apyáp nak ma'a Macbená tén han Guibeá. Yetneyk axta han xama apketche kelwána m'a Caleb ekwesey axta Acsa.
50 Keso Caleb axta aptawán'ák neptámen se'e.
Hur axta apketchek se'e, étche átnaha apketkok axta m'a Efrata: Sobal, apyáp nak Quiriat-jearim; 51 Salmá, Belén apyáp; tén han Haref, Bet-gader apyáp.
52 Keso Sobal axta apketchek, apyáp nak Quiriat-jearim: Reaías, manahetitas axta nápakha', 53 keñe han Quiriat-jearim axta apnámakkok: cham'a itritas, futitas, sumatitas tén han misraítas, apkeleñamakxa axta apkelánteyapma m'a soratitas tén han ma'a estaolitas.
54 Salmá apketchek: Belén, netofatitas, Atrot-bet-joab, nápakha' axta han ma'a manahetitas, tén han ma'a soreítas, 55 tén han soferitas axta apnámakkok, apheykencha'a axta m'a Jabés, cham'a tirateos, simateos tén han sucateos. Cháxa quenitas, Hamat axta aptawán'ák neptámen, apyáp axta m'a Bet-recab.
© © Enxet Lengua Sur Bible © Paraguayan Bible Society, 2015.