Hiram tén han David
(2 Sa 5.11-12)1 Apkeláphássek axta apseykha amya'a aphakxa David ma'a Hiram, wesse' apwányam nak yókxexma Tiro, keñe han apkeláneyak tegma, tén han ma'a yántéseksek apkeláneyak nak, apkelsókók axta yántéseksek ekwesey nak cedro yaqwayam elanaksek apxagkok apyawe aptaqmalma. 2 Apyekpelchágwokmek axta David aptáha Wesse' egegkok apteméssesso wesse' apwányam ma'a Israel, hakte aptekkessessegkek apagko' axta aqsok neyseksa apteme wesse' apwányam, eñama apkelásekhayo m'a énxet'ák apagkok Israel.
Pók apketchek makham David
(2 Sa 5.13-161 Cr 3.5-9)3 Apkelmeykekxeyk axta makham David mók kelán'a apnaqteyegka'a éleñama m'a Jerusalén, keñe apkelweteykekxo makham pók apkelennay'ák apketchek tén han kelwán'ák apketchek. 4 Keso apkelwesey axta apketchek appalleyam ma'a Jerusalén: Samúa, Sobab, Natán, Salomón, 5 Ibhar, Elisúa, Elpélet, 6 Nógah, Néfeg, Jafía, 7 Elisamá, Eliadá tén han Elifélet.
David apmenxenma filisteos
(2 Sa 5.17-25)8 Xama axta apkelleg'a amya'a filisteos kélteméssesa David wesse' apwányam ma'a ekyókxoho nak Israel, keñe apkelmahágko apyókxoho m'a yaqwayam emok; apleg'ak axta eyke amya'a m'a David keñe apkelanyexágko. 9 Apchágketchessekmek axta m'a filisteos, yetlókok axta han apkelnapma énxet'ák, apkelmenyexchásegkek axta han chá'a aqsok apagkok ma'a ekyapwátegweykenxa nak xapop ma'a Refaim. 10 Keñe axta David apkelmaxneyáncha'a m'a Wesse' egegkok, aptáhak axta s'e:
—¿Ewancheya sa' ko'o aktamagkok filisteos? ¿Hemallahancheseya sa' ko'o nepyeseksa m'a énxet'ák nak?
Apchátegmowágkek axta Wesse' egegkok:
—Ektamák sa', hakte amallahanchesek sa' ko'o exchep nepyeseksa m'a énxet'ák nak.
11 Apmahágkek axta David ma'a Baal-perasim, keñe apmenxena m'a. Axta keñamak aptáha s'e: “Emeykessásekxeyk ko'o nepyeseksa sélenmexma m'a Dios, ektémól'a yegmen ényé.” Keñe kélteméssesa ekwesey Baal-perasim xa yókxexma nak. 12 Apkexakkek axta aqsa han aqsok apcháyókxa filisteos ma'a, keñe axta David apkeltamho kólwatnekxa'.
13 Apkelnáhapweykxeyk axta eyke makham filisteos tén han apkelmenyexchásegko aqsok apagkok énxet'ák ma'a ekyapwátegweykenxa nak xapop ma'a Refaim, 14 tén axta apkelmaxneyáncha'a makham David ma'a Dios, apchátegmowágkek axta Dios:
—Nágkólmohok aqsa apmonye' kólchetamagkok, kólwakha sa' sekxo', neptámen sa' kóleñék kólchetamagkok kélwokmo enxoho m'a élámhakxa nak yámet élmátsa nak élpaqneyam. 15 Kélleg'ak sa' agkok ektémól'a anxog ma'a néten nak naw'ék yámet élyawe, kólchetamák sa' kólnapaxche', hakte cháxa magkenatchesso sekxega ko'o kélmonye'e, yaqwayam alnápok ma'a sẽlpextétamo filisteos.
16 Aptemék axta David ma'a apkeltamhókxa axta etnehek Dios, keñe apmenxena m'a sẽlpextétamo filisteos, eyeynókxa m'a yókxexma Gabaón ekweykekxoho m'a yókxexma nak Guézer, 17 payheykekxeyk axta ektémakxa apxénamap David ma'a ekyókxoho apkelókxa nak, Wesse' egegkok axta apteméssesso yaqwayam yeykpok chá'a m'a ekyókxoho apheykegkaxa nak.
© © Enxet Lengua Sur Bible © Paraguayan Bible Society, 2015.